Дьокуускай: «Малая родина – сила России» III Бүтүн Арассыыйатааҕы муниципальнай форум

Бу күннэргэ Дьокуускайга «Малая родина – сила России» III Бүтүн Арассыыйатааҕы муниципальнай форум буола турар.

Олохтоох бэйэни салайыныы Бүтүн Арассыыйатааҕы ассоциациятын (ВАРМСУ) тэрээһинэ Арассыыйа муниципальнай тэриллиилэрин бэрэстэбиитэллэрин Дьокуускай куоракка «Опорные точки роста: пространственное развитие территорий» тиэмэни дьүүллэһиигэ муста.

Быйылгы форумҥа Арассыыйа араас регионнарыттан мустубут 80-ча муниципалитет салайааччылара Саха сирин тыйыс усулуобуйатыгар үлэ уопутун билсэр, санааларын үллэстэр  соруктаахтар.

Ол курдук, дэлэгээттэр чуолаан Дьокуускай куоракка «Якутдорстрой», «Теплоэнергия» тэрилтэлэр үлэлэрин кытта билистилэр. Көрбүккэ-истибиккэ сыһыаннаан, холобура, халтарааны кытта үлэ уопутун сурастылар, хаары хомуйуу үлэтин иэниттэн сөхпүттэрин биллэрдилэр.

Куорат баһылыга Евгений Григорьев кэпсээниттэн көҕөрдүү үлэтигэр стандарт киирбитин, компост оҥорор полигон тэриллибитин биһирээтилэр. Ирбэт тоҥ усулуобуйатыгар дьиэни тутуу, сылаас тохтобуллар тиэмэлэрэ дойду соҕуруу регионнарын муниципалитеттарын салайааччыларын интэриэһиргэппитэ чахчы.

Форуму үөрүүлээхтик арыйыы ахсынньы 11 күнүгэр Ойуунускай аатынан Саха тыйаатырыгар буолан ааста, диэн Олохтоох дьаһалта пресс-сулууспата иһитиннэрэр.