Дьокуускай куорат олохтоохторо Максимовтар «Килбиэннээх дьиэ кэргэн» анал бэлиэнэн наҕараадаланнылар

50 сыл бииргэ олорбут Надежда уонна Федот Максимовтарга Дьокуускай куорат Олохтоох дьаһалтатыгар Ил Дархан Айсен Николаев олохтообут «Килбиэннээх дьиэ кэргэн» анал бэлиэни туттардылар.

Үрдүк наҕарааданы үбүлээрдэргэ Олохтоох дьаһалта баһылыгын солбуйааччы Владимир Аржаков туттарда.
Федот Павлович уонна Надежда Афанасьевна Максимовтар 1970 сыллаахха Амма улууһун сэллик балыыһатыгар үлэҕэ киирэн билсэн, ыал буолан олоруохтарыттан, нэһилиэк, билигин Дьокуускай куорат уопсастыбаннай олоҕор көхтөөх кыттыыны ылаллар, чөл олоҕу тарҕаталлар. Биэс оҕоҕо күн сирин көрдөрөн, үөрэхтээх, үлэһит дьон гына иитэн таһаарбыт, чахчы да, килбиэннээх ыал.
Максимовтар куорат, өрөспүүбүлүкэ, аан дойду таһымнаах тэрээһиннэр көхтөөх кыттыылаахтара. Бэйэлэрин кэмигэр «Эрэл» вокальнай-инструментальнай ансаамбылы тэрийэ сылдьыбыттар. Билигин даҕаны балалайкаҕа оонньууллар, бальнай үҥкүүнэн дьарыктаналлар, диэн иһитиннэрэр Олохтоох дьаһалта пресс-сулууспата.