Дьокуускай куорат олохтооҕо Федора Иванова 103 сааһын туолла

Куорат баһылыгын солбуйааччы Владимир Аржаков бүгүн сэрии уонна тыыл бэтэрээнэ, куорат олохтооҕо Федора Николаевна Иванованы 103 сааһынан эҕэрдэлээтэ. 
Ытык кырдьаҕаска Дьокуускай куоракка бастакынан «1941-45 сс. Аҕа дойду Улуу сэриитигэр кыайыы 80 сыла» диэн 2024 сыл балаҕан ыйын 1 күнүгэр дойду баһылыгын ыйааҕынан олохтоммут мэтээли туттардылар. 
Владимир Аржаков бэйэтин эҕэрдэ тылыгар Федора Николаевна тыылга тус кылаатын таһынан, Саха сирин науката, үөрэхтээһинэ атаҕар турарыгар бүтүн дьиэ кэргэнин кылаатын тоһоҕолоон бэлиэтээтэ итиэннэ Федора Николаевна бииргэ төрөөбүт быраата Иванов Василий Николаевич М.К. Аммосов аатынан Саха судаарыстыбаннай университетыгар үөрэнэр кэмигэр үөрэппитин ахтан-санаан ааста.
Федора Николаевна Иванова Бүлүү уокуругун Марха улууһун Тааркаайы нэһилиэгэр (билиҥҥинэн Ньурба улууһун Дьаархан нэһилиэгэ) 1922 сыл олунньу 14 күнүгэр сэттэх оҕолоох ыалга төрөөбүтэ. Ыал улахан уола Дмитрий 1941 сыллаахха сэриигэ ыҥырыллан барбытын кэннэ 1943 сыллаахха дьоно Новгород сиригэр өлбүтүн туһунан иһитиннэриини туталлар. Сэрии кэнниттэн Федора Николаевна Денисов Егор Николаевич диэн партия үлэһитигэр кэргэн тахсан, түөрт оҕону күн сирин көрдөрөллөр. Оҕолор кэлин бары үрдүк үөрэхтээх исписэлиис буоланнар, үөрэх, наука эйгэтигэр хорутуулаахтык үлэлээтилэр. 
1958 сыллаахха Федора Николаевна Дьокуускайга кэлэн иистэнэр фабрикаҕа үлэлии киирэн, сыл аҥаарынан иистэнньэҥ идэтин баһылыыр. 1966 сыллаахха дьиэ кэргэн төттөрү Ньурбаҕа көһөн, Федора Николаевна райбыткомбинакка иистэнньэҥинэн, райпотребсойууска атыыһытынан үлэлиир. 
1978 сылтан Дьокуускай куорат олохтоохторо. 1997 сыллаахха бочуоттаах сынньалаҥҥа тахсыар диэри Федора Николаевна Дьокуускайдааҕы тыа хаһаайыстыбатын техникумугар буҕаалтыр-кассирынан үлэлиир.
Федора Иванова өр сыллаах үтүө суобастаах үлэтин үгүс ахсааннаах грамота, наҕараада туоһулуур. 2021 сыллаахха «СӨ Ытык кырдаҕаһа», 2024 сыллаахха «Үйэ саас» анал бэлиэлэринэн наҕараадаламмыта, диэн Олохтоох дьаһалта пресс-сулууспата иһитиннэрэр.
Федора Николаевнаны кытта 2024 сыл ыам ыйыгар интервьюну «Киин куорат» саайтыгар ааҕыахха сөп: https://kiinkuorat.ru/articles/ytyk-kyrda-as-fedora-ivanova-olo-u-chie-ineydik-yraastyk-oloruohha