Дьокуускай куорат маастар-былаанын олоххо киллэрии хаамыытын дьүүллэстилэр

Манна култуура уонна спорт эбийиэктэрин тутуу былааннарын чопчулаатылар уонна кэккэ боппуруостары быһаарар суоллары торумнаатылар. Сорох бырайыактарга бырайыак-смета докумуона бэлэм, үбүлээһиннэрэ быһаарыллыбыт, атыттарга бу үлэни ыытар сорук турда.

“Киин куорат” ааҕааччыларыгар былааҥҥа киирбит култуура эбийиэктэрин билиһиннэрэр:

• Хатас, Октябрьскай, Сайсары уонна Строительнай уокуруктарга – оҕо искусствотын оскуолалара;  
• Пригороднай сэл. уонна Кангалааска – култуура, сынньалаҥ тэрилтэлэрэ.

Спорт эбийиэктэрэ:

• Пригороднай сэлиэнньэҕэ – элбэх хайысхалаах комплекс;
• Мархаҕа уонна Тулагы Киллэм нэһилиэгэр – оҕо спорт оскуолалара;
• Бүлүүлүүр суолга – «Спорт эстетическэй көрүҥнэрин киинэ» спорт дыбарыаһа уонна күөн көрсүһүү саалата;
• Автодорожнай уокурукка элбэх хайысхалаах спорт комплекса;
• Бестужев-Марлинскай уулуссатыгар элбэх хайысхалаах комплекс.

Мунньах түмүгүнэн туһааннаах салааларга бырайыактыыр үлэлэри тэҥҥэ ыытарга уонна федеральнай үбүлээһини сөбүлэһиннэриигэ сорудах бэрилиннэ. Онно сир учаастактарын боппуруостарын быһаарыы эбилиннэ.