Дьокуускай куорат баһылыгын Кубога
Муус устар 27 күнэ Саха сирин олохтоохторугар дьоһун суолталаах. Бу күн өрөспүүбүлүкэбит уопсастыбаннай уонна политическай олоҕо икки бөдөҥ, бэлиэ түгэни кытта ситимнээх. Ол курдук, 1922 сыллаахха Саха Автономнай Сэбиэскэй Социалистическай Өрөспүүбүлүкэ (Саха АССР) төрүттэммитэ. Ити күнтэн лоп курдук 70 сыл буолан баран, 1992 сыллаахха, Саха сирэ Арассыыйа Федерациятын субъега буоларын бигэргэтэн, Өрөспүүбүлүкэ Төрүт сокуона – СӨ Конституцията күүһүгэр киирбитэ.
Саха Өрөспүүбүлүкэтин күнүгэр Дьокуускай куораппыт болуоссаттарыгар, култуура кииннэригэр араас таһымнаах тэрээһиннэргэ норуот халҕаһалыы анньан кэллэ.
Бу күн сарсыарда 11.00 чаастан Өрөспүүбүлүкэни төрүттээбит улуу дьоммут пааматынньыктарыгар сибэкки дьөрбөтө уурулунна. Онтон 12.00 чаастан эдэр ыччат уопсастыбаннай хамсааһыннара Дьокуускай куорат устун сэлэлии хаамыылара буолла. Күн устата бу күҥҥэ аналлаах кэнсиэртэр, быыстапка арааһа былаһааккаларынан элбэх киһини түмтэ.
Дьокуускайга Өрөспүүбүлүкэ болуоссатыгар Сомоҕолоһуу оһуокайа үрдүк таһымнаахтык ааста.
Биир ураты тэрээһининэн Дьокуускай куорат Баһылыгын Кубогар ох саанан ытыыга күрэхтэһии буолла. Ол курдук, муус устар 26-27 күннэригэр Дьокуускай куорат баһылыгын Кубогар ох саанан ытыыга күрэхтэһиигэ Томпо, Амма, Сунтаар, Бүлүү, Хаҥалас о.д.а. улуустартан кытыннылар.
Егор Баранов, Дьокуускай куорат Баһылыгын Кубогын кыайыылааҕа, Амма:
– Амматтан Кубогы ылардыы диэн оҥостон кэлбитим (күлэр – Аапт.). Бу күрэхтэһиигэ илин эҥэрдэр икки киһи ытар «микс» диэн көрүҥҥэ отут икки хамаандаттан бастаатыбыт. Олох үчүгэй, интэриэһинэй күрэх буолла.
Кэлиҥҥи сылларга ох саа спордугар улахан болҕомто ууруллар буолан, билигин бу көрүҥҥэ кыттааччы ахсаана биллэ элбээтэ, интэриэс даҕаны улаатта. Күрэхтэһииттэн күрэхтэһиигэ саҥаттан саҥа дьон эбиллэн иһэр.
Тверь куоракка "Игры кочевников" кытта барарбар миигин Александр Наумов спонсордаан ыыппыта. Онтон кынаттанан, ох сааҕа хоннохтоохтук кыттыһан, дьарыктанан барбытым. Икки сыллааҕыта дойдубар Аммаҕа суос-соҕотох этим, онтон кэргэним өйөөн, икки буолбуппут. Бүгүҥҥү күҥҥэ сүүрбэттэн тахса киһи ох саанан дьарыктанар. Бу курдук энтузиаст дьон баар буоланнар, төрүт дьарыкпыт сайдан иһэрэ хайҕаллаах.
Өрөспүүбүлүкэни төрүттээбит Улуу дьоммут пааматынньыктарыгар сибэкки дьөрбөтө уурулунна
Доҕордоһуу болуоссатыттан ыччат уопсастыбаннай тэрилтэлэрэ сэлэлии хаамтылар
А.Е. Кулаковскай аатынан Норуоттар доҕордоһууларын дьиэтэ СӨ бастакы Бэрэсидиэнэ М. Е. Николаевка аналлаах «Саха сирэ — мин дойдум» быыстапка буолла
Сонуннар
Ордук ааҕаллар
