Дьокуускай куорат баһылыга Евгений Григорьев бүгүн, муус устар 14 күнүгэр сиргэ сыһыаннаах боппуруостарга гражданнары приемнаата

Ол курдук, анал байыаннай дьайыы кыттыылааҕа Александр С. сир ыларга "Боотур" кэлэктиибинэн сайаапката сүтэн, сири анатыы уочаратын испииһэгэр бүтэһик буолан хаалбытын иһитиннэрдэ. Евгений Григорьев сир учаастагын ылыыга сайабылыанньаны киһи тус бэйэтэ эрэ эбэтэр кини аатыттан аймахтара Дьокуускайдааҕы "Сир сыһыаннаһыыларыгар ааҕыныстыба" нөҥүө биэриэхтэрин сөбүн, ол кэннэ биирдэ сайабылыанньаласпыт гражданнары испииһэк бэрээдэгинэн сири анааһыҥҥа ыҥыралларын быһаарда.
Оттон Анна Б. куорат баһылыгар дьиэни туттарга сир учаастагын боппуруоһунан киирдэ. Сири ыларга былааннааһын уонна межеваниены оҥорторуу бэрээдэк түһүмэхтэрин барытын ааспыт эрээри, учаастагын ыла илигин кэпсээтэ. Евгений Николаевич бу боппуруоһу быһаарсарга эрэннэрдэ, бу этиллибит чахчыларынан служебнай бэрэбиэркэни көҕүлүүргэ кини аатыгар сайабылыанньа суруйарыгар сүбэлээтэ.

Санатар буоллахха, куорат баһылыга гражданнары тус боппуруостарынан приемнааһына эрдэттэн суруйтарыы бэрээдэгинэн ыытыллар. Приемҥа суруйтарыан баҕалаах олохтоох дьаһалта гражданнары  кытта үлэлиир салаатыгар туох кыһалҕалааҕын, бу боппуруоһу быһаартара ханнык туһааннаах тэрилтэҕэ сүүрбүтүн ыйан туран, сайабылыанньа суруйан туттарар. Сайабылыанньаҕа төлөпүөнүн нүөмэрин эбэтэр электроннай почтатын, олорор аадырыһын чопчу ыйар.

Сайабылыанньаны ыытыы көрүҥнэрэ:

- yakutsk@yakadm.ru официальнай электроннай почтаҕа;

- Дьокуускай к., Ленин проспегын 15-һэ почта  аадырыһыгар.
- Олохтоох дьаһалта гражданнары уонна тэрилтэлэри кытта үлэлиир салаатыгар аҕалан туттарыахха сөп, аадырыһа: Дьокуускай куорат, Ленин просп., 15, 109-с кэбиниэт, үлэ күнүгэр 9:00 чаастан 18:00 чааска диэри (эбиэт – 13:00 чаастан 14:00 чааска диэри).
Баһылык тус приемугар суруттарыы боппуруостарыгар консультацияны 40-80-76 нүөмэринэн ылыахха сөп.