Дьокуускай куоракка Ирина Елизарова аатынан искибиэр баар буолуоҕа

Ахсынньы 22 күнүгэр Барыбааталыстыба Бэрэссэдээтэлин Бастакы солбуйааччы Дмитрий Садовников салайааччылаах биэдэмистибэлэр икки ардыларынааҕы Олохтоох көҕүлээһиннэри өйүүр бырагыраама күрэҕин кыайыылаахтарын быһаарда.

Күрэххэ 2025 сыл алтынньы 16 күнүттэн сэтинньи 18 күнүгэр диэри өрөспүүбүлүкэ 366 муниципальнай тэриллиититтэн уопсайа 501 сайаапка киирбит. Мантан 369 бырайыак кыайыылааҕынан ааттанан, 2026 сылга олоххо киириэхтэрэ. СӨ үп министиэристибэтин саайта суруйарынан, кыайыылаах бырайыактарга өрөспүүбүлүкэ бүддьүөтүттэн уопсайа 727,6 мөл. солк. тыырыллыаҕа.

Саамай элбэх бырайыак суол (62), маассабай сынньалыҥ (77) хайысхаларыгар киирбит. Ордук аҕыйах сайаапка сибээс өҥөтүн тупсарыыга (1), көмүүгэ (4), бөҕү хомуйуу уонна тиэйии эйгэтигэр (8) суруллубут.

Санатар буоллахха, Дьокуускай куорат Строительнай уокуругар Лермонтов уулуссатыгар эстрада ырыаһыта Ирина Елизарова доҕотторо, биир дойдулаахтара, аймахтара хаһыс да сылларын талааннаах ырыаһыкка Дьокуускай куоракка туруорсубут искибиэрдэрин бырайыага кыайыылаахтар кэккэлэригэр киирбит. 

«Биһиги Ирабыт эдэркээн сылдьан ыраах Томпо кыра дэриэбинэтиттэн кэлэн аата ааттанар, биллэр-көстөр, норуот тапталын ылар Дьокуускай куоратыгар искибиэр арыллара кэрэхсэбиллээх”, – диэн талааннаах ырыаһыт доҕотторо баҕа санаалара туолбутунан эҕэрдэлиибит.