ДЬОКУУСКАЙ ЭРГЭ ТУТУУЛАРА: Спасскай манастыыр

Куораппыт эргэ тутууларын салгыы билиһиннэрэбит. Бу сырыыга – Спасскай эр дьон манастыыра.

Спаситель Иисус Христос үрдүк аатыгар Спасскай манастыыр 1640 сыллаахха тутуллар. 1735 сыллаахха манна олохтоох нэһилиэнньэ оҕотун ааҕарга-суруйарга үөрэтэр оскуола арыллар уонна 1747 сылга диэри үлэлиир. Манастыыр араас сылларга 10-ча бас билэр тутуулаах, үс храмнаах, колокольнялаах, хаһаайыстыбалаах, ынах сүөһүлээх эбит. Манна таҥара үлэһиттэрин бэлэмниир духовнай училище, миссионерскай училище, духовнай семинария, дьахталлар епархиальнай училищелара үлэлииллэр. Архиерейскэй покой дьиэтин, православнай таҥара дьиэтин үрдүкү чыыннаах-хааннаах үлэһиттэрэ олорор дьиэлэрэ баара.

Сэбиэскэй былаас манастыыр баайын-дуолун былдьаан, дьиэтин-уотун Кыраайы үөрэтэр музейга биэрэр. 1923-1974 сс. манастыыр дьиэлэриттэн биирдэстэригэр архыып үлэлии сылдьыбыт. Бүгүҥҥү күҥҥэ Спасскай манастыыр сорох чааһа Ем. Ярославскай аатынан музей сүрүн дьиэтэ буолан турар.

17-с үйэтээҕи тутуу Спасскай эр дьон манастыырын ити курдук сэбиэскэй кэмҥэ барытын алдьаппыттар, сорҕотун баһаар сиэбит.

2012 сыллаахха манастыыр таҥаратын дьиэтэ чөлүгэр түһэриллибитэ.