ДЬОКУУСКАЙ ЧААҺЫНАЙ ОСКУОЛАЛАРА. 15 500 солк. саҕалаан...

Дьокуускайга бастакы чааһынай оскуоланы 1801 сыллаахха А.И. Винокуров арыйбыта биллэр. Чааһынай оскуолаларга суруйааччы Бестужев-Марлинскай, этнограф В.М. Ионов, биллиилээх атыыһыт Сэрбэкэ уола И.Н. Эверстов, о.д.а. үлэлээбиттэрин история кэрэһилиир.

Аныгы чааһынай оскуолалар былыргы маннык оскуолалартан биир сүрүн уратыларынан төлөбүрдээхтэрэ буолар.

"Киин куорат" Дьокуускай бүгүҥҥү чааһынай оскуолаларын сыаналарын, өҥө оҥорооччу быһыытынан туох уратылаахтарын билистэ. Нүөмэрдэрин 2ГИС эбэтэр официальнай саайтарыгар холкутук булуохха сөп.

Биһиги матыыппыт: 1-кы уонна 7-с кылааска үөрэнэр оҕолордоохпут, оҕолорбутугар дьэ кэлэн өйдөнөн, куорат чааһынай оскуолаларыгар миэстэ көрдүүбүт. Биллэн турар, бастатан туран, ыйдааҕы төлөбүр төһө буоларын билэр сыаллаахпыт.

***

Бастакынан саха эстрадатын ырыаһыта, ону кытта урбаанньыт Анатолий Бурнашев "САХАТ" чааһынай үөрэх тэрилтэтигэр эрийэбит. Олус эйэҕэстик сахалыы, толорутук уонна сиһилии кэпсээтилэр: ыйдааҕы төлөбүрдэрэ – 45 000 солк., ый 5-с чыыһылатыгар диэри ый аайы кэмигэр төлөнөн иһиэхтээх. Оҕолору күҥҥэ үстэ иҥэмтиэлээх аһынан аһаталлар.

Уруок кэннэ бастакы кылаас оҕото 16:00 чааска диэри эбии дьарыктарга, куруһуоктарга хаалыан сөп. Сатаан эрдэ ылбат дьон кэпсэтэн, дьуһуурунуй учууталга 18:00 чааска диэри хаалларыахтарын  эмиэ сөп эбит. Онтон 2-с кылаастан саҕалаан оҕолорго 18:00 чааска диэри араас хайысхалаах дьарыктар тэриллэллэр.

Кылаастара гендернэй – уолаттары, кыргыттары арааран үөрэтэллэр. Ол эрэн туох баар тэрээһиннэрэ, бырааһынньыктара барыта холбуу буолаллар – ол аата уол/кыыс алтыһыыта син биир баар буолар.

Маҥнайгы кылааска быйыл билиҥҥитэ 9 оҕо суруттарбыт, элбээбитэ 15 оҕо буолара буолуо диэн сабаҕалыыллар. Бу оскуолаҕа кылаастара ортотунан 25 оҕолоохтор.

Үөрэх барыта “Школа России” бырагырааманан барар, учебниктар атын оскуолаларга курдук нууччалыыллар, ол эрэн сахалыы эйгэ олохтонор, тэрээһин барыта сахалыы ыытыллар.

Оҕолор дьиэлэрин таһыттан оскуола оптуобуһунан ылыы-аҕалыы эбии өҥө быһыытынан баар.

Бу субуотаҕа 12:00 чаастан төрөппүт мунньаҕар кэлэн барытын көрүөххүтүн-истиэххитин, дириэктэрбитин кытта кэпсэтиэххин сөп диэн ыҥырдылар.

***

Салгыы “Гран” чааһынай начаалынай оскуолаҕа эрийэбит. Бу оскуола “Тик-Так” диэн оҕону сайыннарар кииннээх эбит, судургутук эттэххэ, оскуоланы сэргэ чааһынай уһуйааннаахтар.

Майнайгы кылааска ылыы салҕанар. Ыйдааҕы төлөбүрдэрэ – 28 000 солк. Оҕо киэһэ 18:00 чааска диэри, уһуйааҥҥа сылдьар оҕо курдук, күҥҥэ үстэ аһаан, уруок кэннэ арааһынан эбии дьарыктанан, төрөппүттэрэ кэлэн ылыахтарыгар диэри көрүүгэ-истиигэ сылдьар.

“Төлөбүрэ хас күн сылдьыбытынан (аһаабытынан) көрөн таабылланан иһэр, онон сорох ыйдарга интэн кыччыан сөп”, - диэн үчүгэй баҕайытык лоп баччы быһааран биэрдилэр, эмиэ кэлэ сырыт кэпсэт, көрөн-истэн бар диэн ыҥырдылар.

***

“Личность” уопсай сүрүн үөрэхтээһин оскуолата Дьокуускайга 1994 сыллаахтан аһыллан үлэлиирэ биллэр. 7-11 кылаас оҕолорун ылаллар.

Нүөмэрдэрин 2ГИС-тан булан эрийэн сыаналарын ыйыппыппытыгар улаханнык кыйахана быһыытыйдылар. Култуура диэн ханан да сыстыбатах кэрэ аҥаар быһыта-орута баттаан эппиэттэстэ, “тоҕо биһиги сыанабытыгар наадыйдыҥ?” диэн куруубайдаата, онтон “барытын саайпытыттан көрүөххүн!” диэн буолла. Холдьоҕулуннарбыт да, саайтарын булан ыллыбыт – сыаналара ханна да ыйыллыбатах.

Иккистээн эрийдибит, бу сырыыга эрэдээксийэттэн суруналыыстар интэриэһиргиирбитин этэн туран ыйыта сатаатыбыт... Син биир ол куруубай куолас саҥаран-иҥэрэн силбиэтэннэ, “наадыйар буоллаххытына кэлэн билсиҥ ээ!” диэн күргүйдээтэ. Онон бүттүбүт...

***

Дьокуускайдааҕы Гуманитарнай лицей – оҕолору 1-11 кылаастарга ыла олорор. Кылааһыттан тутулуга суох, ыйдааҕы төлөбүрдэрэ – 15 500 солк. Үөрэнээччи урут үөрэммит оскуолатыттан таабылын, характеристикатын, төрөөбүтүн туһунан сибидиэтэлистибэтин аҕалар.

Эбии дьарык, куруһуок, продленка диэн суох, оҕолор үөрэнэн эрэ баран тарҕаһаллар.

***

Илин-Сибиирдээҕи лицей. Оҕолору маҥнайгы кылаастан саҕалаан ылаллар. Сыллааҕы төлөбүрэ – 180 000 солк., ол аата ый аайы 18 000 солк. төлүөххэ сөп. Биир дьиэ кэргэнтэн икки оҕо үөрэнэр буоллаҕына, 5%  чэпчэтии оҥороллор.

Продленка, ол аата уруок кэннэ хаалан эбии дьарык, туспа төлөбүрдээх. Оҕолор оскуолаҕа киэһэ 18:00 чааска диэри сылдьыахтарын сөп.

Киирэллэригэр математикаҕа уонна нуучча тылыгар тургутууну ааһаллар. Урукку оскуолаларыттан характеристика, таабыл аҕалаллар.

Быйыл маҥнайгы кылаастарыгар 17 оҕо суруттарбыт.

***

“Точка развития” чааһынай начаалынай оскуола. Ыйдааҕы төлөбүрэ – 31 000 солк. буоларын эрэ билэн хааллыбыт. Уруок кэннэ продленкаҕа хаалан дьарыктаныахтарын сөп. Билигин 1-4 кылаастарга оҕолору ыла олороллор. Оҕону ылыахтарын иннинэ бэйэтин кытта кэпсэтэллэр. 

Бэлиэтээн эттэххэ, бу оскуолалар бары лицензиялаахтар, орто үөрэхтээһининэн дьарыктанар көҥүллээхтэр.