"Дьокуускай — Аллараа Бэстээх" хайысханан паром сырыыта быйыл эрдэ аһыллыа

Дьокуускай аннынан навигацияны арыйыы официальнай болдьоҕо Росморречфлот дьаһалынан ыам ыйын 25 күнүгэр бигэргэммитэ. Ол эрээри халаан уута эрдэ кэлбитинэн, Дьокуускай — Аллараа Бэстээх сүрүн паромун сырыытын ыам ыйын 22–25 күннэригэр диэри саҕалыырга былаанныыллар. Саха сирин тырааныспарка министиэристибэтэ иһитиннэрбитинэн, билигин биэрэктэри, киирии суоллары уонна мунньар былаһааккалары тупсарыыга күүстээх үлэ бара турар.

Ааһар дьон ахсаанын элбэтэр уонна кэтэһии бириэмэтин кыччатар сыалтан, мунньар былаһааккаларга балачча эбии балаһалар оҥоһулуннулар: Дьокуускай өттүттэн икки, Аллараа Бэстээх өттүттэн үс балаһа эбилиннэ. Каартанан төлөбүрү киллэрии былааннанар — причалларга стационарнай терминаллар туруоруллуохтара. Өлүөнэни туоратыыга бастакы кэмҥэ «Паромы Якутии» альянс 8 парома уонна «АЯМ» ассоциация 3 таһаҕас парома үлэлиэхтэрэ.

Саха сиринээҕи сыана быһар Судаарыстыбаннай кэмитиэт муҥутуур үрдүк тарыыптары бигэргэтэр, олор тиэйээччилэр бэйэлэрин сыаналарын олохтуулларыгар тирэх буолуохтара.

Паромнар быһа холоон сылдьар болдьохторо:

Хачыкаат — Мохсоҕоллоох: ыам ыйын 22–25 күннэрэ;

Кангалаас — Суотту: ыам ыйын 22–25 күннэрэ;

Мэҥэ Алдан — Кэскил: ыам ыйын 25–27 күннэрэ;

Үөһээ Бүлүү — Хоро: ыам ыйын 20–21 күннэрэ;

Ньурба — Күндээдэ: ыам ыйын 20–21 күннэрэ;

Сунтаар — Устье: ыам ыйын 20–21 күннэрэ;

Кириэстээх — Мииринэй: ыам ыйын 20–21 күннэрэ;

Уус Маайа — Элдьикээн: ыам ыйын 25 күнүгэр;

Амма — Бөтүҥ: ыам ыйын 18 күнүгэр;

Өлүөхүмэ — Заречнай: бэс ыйын 1 күнүгэр.