Дьокуускай аэропорда сааскы-сайыҥҥы араспысаанньаҕа көһөр

Дьокуускайтан сааскы-сайыҥҥы кэмҥэ 39 хайысханан сырыы тиһигин быспакка ыытыллыа. 7 авиахампаанньа ааллара көтүөхтэрэ.

Сааскы-сайыҥҥы кэмҥэ Дьокуускайттан Москваҕа диэри барар рейстэри үс хампаанньа оҥоруоҕа: “Сибирь” (S7 Airlines), “Якутия”, “Аэрофлот”.

“Аэрофлот” нэдиэлэҕэ алта күн сууккаҕа биирдэ көтөр. Ол эрээри от ыйын 8 күнүттэн атырдьах ыйын 31 күнүгэр нэдиэлэҕэ үс рейс эбиллиэҕэ.      

«Сибирь» (S7 Airlines) ааллара салгыы күн аайы Москваҕа, Новосибирскайга уонна Иркутскайга көтүөхтэрэ. Маны сэргэ бу хампаанньа бэс ыйын 15 күнүттэн балаҕан ыйын 3 күнүгэр диэри бэнидиэнньиккэ, чэппиэргэ, субуотаҕа уонна баскыһыанньаҕа Новосибирскайга диэри нэдиэлэҕэ түөрт рейси оҥоруоҕа. Ону таһынан бэс ыйын 10 күнүттэн атырдьах ыйа бүтүөр диэри Владивостокка диэри өссө үс рейс киириэҕэ.

«Якутия» авиахампаанньа салгыы Москва (Внуково), Санкт-Петербург, Екатеринбург, Новосибирскай, Иркутскай, Хабаровскай хайысхаларынан үлэтэ салҕанар. Сочи уонна Минеральные Воды куораттарга «Внуково» порка тохтоон ааһар рейстэр бааллар. Санкт-Петербурга көтүү ахсаана аҕыйаабыт – нэдиэлэҕэ икки рейс. Итини сэргэ ааллар нэдиэлэҕэ биирдэ Москва – Якутск – Певек хайысханан көтүөхтэрэ. Харбиҥҥа норуоттар икки ардыларынааҕы рейстэр нэдиэлэҕэ иккитэ оҥоһуллуохтара. Маны сэргэ, Дьокуускайтан Пекиҥҥэ диэри быһа рейстэр баар буолуохтара.

«Россия» авиахампаанньа Красноярскайга диэри рейстэрин нэдиэлэҕэ алтата оҥоруоҕа.

Өрөспүүбүлүкэ иһигэр «Полярные авиалинии», «Якутия», «ИрАэро» уонна «Алроса» авиахампаанньалар үлэлиэхтэрэ.