Дьокуускай 400 сааһыгар - 14 уһуйаан, 12 оскуола

Киин куоракка тутуу хаамыытын уонна үөрэх инфраструктуратын сайыннарыы инники түһүмэхтэрин СӨ Бырабыыталыстыбатын бэрэссэдээтэлин солбуйааччы Анатолий Семенов уонна Дьокуускай куорат баһылыга Дмитрий Садовников кыттыылаах мунньахха кэпсэттилэр.

Дьокуускай маастар-былаана – Саха өрөспүүбүлүкэтин киин куоратын сайыннарар биир тутаах бырайыак. Маастар-былаан олоххо киириитэ Дьокуускай 400 сыллаах үбүлүөйүнэн ураты үрдүк суолталанар. Социальнай инфраструктураны сайыннарыы, ол иһигэр саҥа оскуолалары уонна уһуйааннары тутуу киин куорат үбүлүөйүгэр бэлэмнэнии биир сүрүн хайысхата буолар.

Санатан эттэххэ, маастар-былаанынан көрүллүбүт икки оскуола номнуо тутуллубута. Билигин Физико-техническай лицей, 17 №-дээх оскуола эбии тутуута уонна Чайковскай уулуссатыгар оскуола дьиэтэ тутулла тураллар. Маны сэргэ түөрт уһуйаан тутуллар – «Северный» кыбаарталга, Новокарьернай уул., «Воинская часть» кыбаарталга уонна 145-с кыбаарталга.

Уопсайа 24 эбийиэккэ үлэ барар. Мантан сэттэтэ 2027 сылга үлэҕэ киириэхтээх, 17 эбийиэк 2028–2030 сылларга үлэлиэхтэрэ.