Дьокуускай 2026-2027 с. сылытыыга бэлэмнэнэр

Тымныы кыһыннаах дойдуга ити – тыын суолталаах хайысха. Өрүү да буоларын курдук, Дьокуускай кэлэр кыстыкка бэлэмнэниитэ бэлиэр  муус устар 8 күнүттэн саҕаланан барбыта. Мээр бэс ыйыттан саҕалаан, үлэ хас биирдии түһүмэҕэ ырытыыны ааһарын, хонтуруолланарын ситиһэр гына, нэдиэлэ аайы дьүүллэһиллэрин эттэ.  

Евгений Григорьев эппитинэн, Дьокуускайга 76 хочуолунай баар, итинтэн 15-э бу сайын өрөмүөннэниэхтээх. Куораты сылытыынан хааччыйар уопсайа 550 килэмиэтир уһуннаах ситими көрүү-истии ирдэнэр. Ити иһигэр турба уларытыыта,  ситим тымныйбатын туһугар бүрүллэр эргэрбит бүрүөһүнү саҥардыы былааннанар.

Киин куоракка 2650 элбэх кыбартыыралаах дьиэ баар эбит буоллаҕына, итинтэн 2440 дьиэтэ киин сылытыыга холбонон турар. Итиннэ киирсибэт атын дьиэлэр автономнай сылытыылаахтар эбэтэр гаас хочуолунайдара олору сылыталлар. Олорор дьиэ пуондатын сэргэ куоракка 400-тэн тахса социальнай тэрилтэ киин сылытыынан хааччыллар. Ол иһигэр үөрэх, доруобуйа харыстабылын, култуура уонна спорт эбийиэктэрэ бааллар.

Билиҥҥи туругунан, сылытыы ситимнэригэр ыытыллар гидродинамическай ыраастааһын үлэтэ элбэх кыбартыыралаах 200-тэн тахса дьиэҕэ түмүктэммит. 100-тэн тахса элбэх кыбартыыралаах дьиэҕэ сылытыы ситимэ быыһылаабатын (опрессовка)  бэрэбиэркэлээбиттэр. Социальнай тэрилтэлэр инженернэй ситимнэрн көрбүттэр-истибиттэр, ыраастыыр үлэ барбыт.  

Куорат баһылыга сылытыыны холбонор, арахсар болдьоҕо хайдах быһыылаахтык быһаарылларын өссө төгүл хатылаан быһаарда.  Сорохтор сылытыыны мээрийэ баҕарбытынан холбуур-араарар диэн өйдүүллэрэ баар буолар. Оннук буолбатах. Барыта быраабылалаах, усулуобуйалаах. Ол курдук, сокуон быһыытынан, биэс күн устата сууккатааҕы орто тэмпэрэтиирэ  +8 °С  аллара буолла да, сылытыы холбонор. Мээр итинник кэм, үгэс курдук, балаҕан ыйын бастакы декадатыгар түбэһэрин эттэ. Сылааһы араарыы эмиэ ити +8 °С  кыраадыстан 5 күн субуруччу сылыйда да, араарылларын бэлиэтиир тоҕоостоох.

Евгений Григорьев  былырыын, 2025 сыл күһүнүгэр, Дьокуускай куорат өрөспүүбүлүкэҕэ биир бастакынан кыстыкка бэлэм буолуу пааспары ылбытын санатта. Быйыл да  ити ситиһиини хатылаан, куорат тымныы кыһыны кыһалҕата суох туоруур гына, оҥоһуллубут ситимнэрдээх, үлэлииргэ бэлэм буолбут хочуолунайдардаах көрсөр сорук улахан. Онуоха туһааннаах эйгэҕэ үлэлэһэр, салайар тэрилтэлэри кытта биир ситимнээхтик үлэлэһиэхтэрин эттэ.