Дьокутааттар учууталларга бэлэх сууматын 5 тыһ. солк. диэри улаатыннарарга этии киллэрэллэр

Учууталларга, доруобуйа харыстабылын үлэһиттэригэр уонна судаарыстыбаннай үлэһиттэргэ көҥүллэнэр бэлэх лимиитин 3000 солкуобайтан 5000 солкуобайга диэри үрдэтиэххэ, диэн Госдуума дьиэ кэргэн, аҕа, ийэ уонна оҕо көмүскэлин боппуруостарыгар кэмитиэтин бэрэссэдээтэлин бастакы солбуйааччыта Татьяна Буцкая ТАСС-ка этэр.
“Билиҥҥи лимиит 3000 солкуобай. Бу сууманы сокуон быһыытынан 5000 солкуобайга диэри үрдэтэргэ этии киллэрбиппит. Бу ааспыт сылларга, уонунан да сылларга, сыана барыта уларыйда. Уопсайынан, кырата суох сибэкки дьөрбөтө билигин 3000 солкуобай буолуон сөп”, – диэтэ дьокутаат.
Кини бэлиэтээбитинэн, учууталга, бырааска эбэтэр социальнай үлэһиккэ махтаныан баҕалаах дьону сокуону кэһэргэ күһэллибит балаһыанньаҕа киллэрбэт туһугар, сууманы үрдэтии наада, онон сокуону уларытар ордук диэн эбэн этэр. 
Оттон биһиэхэ хайдаҕый? Ааҕааччылар манна сөбүлэһэҕит дуо? Билигин оҕоҥ уһуйааны, оскуоланы бүтэрэр банкетыгар кырата 10-15 тыһ. солк. хомуйаллар, онтон ким даҕаны арааһа 3000 суумаҕа иитээччигэ дуу, учууталга дуу бэлэх биэрбэтэх буолуохтаах. 
Мин оҕом 12 сыл анараа өттүгэр куорат биир биллэр гимназиятын бүтэрэригэр 20-лии тыһыынчаны көрдөөн, хаһыаппытыгар “айдаан” таһааран турардаахпыт. Онно үөрэппит учууталларыгар эрэ буолбакка, оскуола техүлэһиттэригэр тиийэ бэлэх оҥороору, оччо элбэх харчыны көрдөөбүттэрэ. Оттон уһуйааны бүтэрэригэр испииһэк оҥорон биэрбиттэрэ, хаһан да харахтаан көрбөтөх асчыттарбытыгар тиийэ.
Онон, быйыл банкеттаах төрөппүттэр хайыы үйэ харчы хомуйан эрдэххит буолуо, санааҕытын аллараа комментарийга үллэстиэххит диэн эрэнэбит.