Дьокутааттар табаҕалар кыһалҕаларынан үлэлииллэр

Эргэ Табаҕаҕа баар «25-с биэрэстэ» ямщиктарга аналлаах этно-комплекс историческай, култуурунай суолтатын ааһан, туризмы сайыннарыыга, саҥа үлэ миэстэлэрин таһаарыыга туһуланан толкуйдаммыт. Ол эрээри, Табаҕа сэлиэнньэтин баһылыга Алексей Осипов иһитиннэрбитинэн, анал сирэ суоҕуттан, олоххо киирбэккэ турар.

Олохтоох дьаһалта Куораты тутууга уонна архитектураҕа департаменын исписэлиистэрэ бэлиэтээбиттэринэн, бу боппуруос хас да мунньахха көрүллэ сылдьыбыт. Ол курдук, учаастага минерализованнай балаһаны кытта харсыһар буолан, кыраныыссатыгар уларытыылар киириэхтэрин наада. Бырайыагы көҕүлээччилэр итини таһынан Өлүөнэ күргэтин тутуу дирекциятын кытта олохтоох көҕүлээһиннэр бырагыраамаларыгар кыттарга кэпсэтии ыыта сылдьаллар.

Иккис боппуруоһунан Табаҕа олохтоохторун иһэр уунан хааччыйыы кыһалҕата көрүлүннэ. Ол курдук, скважинаттан ылар ууларын састааба санитарнай ирдэбилгэ эппиэттэспэт, ону сэргэ скважина бэйэтэ хаайыы территориятыгар баар. Олох-дьаһах, хомунаалынай хаһаайыстыба департаменын исписэлиистэрэ бүгүҥҥү күҥҥэ 30 км усталаах уу ситимин бырайыага оҥоһулла сылдьарын иһитиннэрдилэр. Онуоха диэри «Теплоэнергия» АУо кытта ууну ыраастыыр установканы толкуйдуур сөптөөҕүн эттилэр.

Табаҕа өттүттэн өрүс кытыла сиҥниитэ сыллата баар кыһалҕа. Онон манна федеральнай былаас болҕомтото ирдэнэр. Итиэннэ бөһүөлэккэ спорт саалата суоҕунан анал комплексы тутуу боппуруоһа көрүлүннэ.