«Доброволец Якутии» бириэмийэҕэ сайаапкалары ылыы салҕанар

Быйыл бэһис төгүлүн ыытыллар "Муус устар" өрөспүүбүлүкэтээҕи ыччат бэстибээлин чэрчитинэн тэрийиллэр "Доброволец Якутии" бириэмийэҕэ сайаапкалары ылыы олунньу 28 күнүгэр диэри ыытылларын тэрийэр кэмитиэт санатар.

Бу сылын аайы туттарыллар бириэмийэ өрөспүүбүлүкэ социальнай сайдыытыгар, дьон олоҕо тупсуутугар көмөлөөх бэйэ баҕа өттүнэн оҥорор үлэлээх көхтөөх дьону, тэрилтэлэри өйүүр, биһириир соруктаах. Манна аҥаардас биирдиилээн волонтердар эрэ буолбакка, бэйэ баҕа өттүнэн оҥоһуллар үлэ эйгэтигэр дьоһун бырайыактары олоххо киллэрэн үлэлэтэ сылдьар кэмиэрсийэтэ суох тэрилтэлэр, ыччат хамсааһыннара уонна муниципальнай тэриллиилэр сайаапкаларын ыытан кыттыахтарын сөп.

Бу бириэмийэ хас да анал ааттарынан туттарыллар.  Физическэй сирэйдэргэ, юридическай статуһа суох тэрилтэлэргэ, холбоһуктарга, судаарыстыбаннай уонна муниципальнай  тэрилтэлэр базаларыгар үлэлиир юридическайа суох тэрилтэлэргэ, холбоһуктарга, ону тэҥэ кэмиэрсийэтэ суох юридическай тэрилтэлэргэ диэн тус-туһунан номинациялар ананаллар.

Бириэмийэни туттарыы үс түһүмэҕинэн барыа:

I түһүмэх – олунньу 1-28 кк. – сайаапкалары тутуу;

II түһүмэх – кулун тутар 3-17 кк. – эксперт хамыыһыйата киирбит матырыйааллары көрөн номинаннары, лауреаттары уонна призердары быһаарыыта;

III түһүмэх – “Муус устар” бэстибээли үөрүүлээхтик сабыы дьоро түгэнигэр кыайыылаахтарга бириэмийэни туттарыы.

“Доброволец Якутии” бириэмийэ туһунан сиһилии иһитиннэриини, мунаарар ыйытыыларгытыгар хоруйдары 8 (999) 060-17-98 нүөмэргэ эрийэн эбэтэр dobro14@inbox.ru электроннай почтаҕа суруйан билсиэххитин сөп.

Бу туһунан СӨ Ыччат министиэристибэтин ТГ-ханаалыгар суруйар.

Хаартыска: vk.com/dobroykt