Дьоһуннаах чат-бот үлэҕэ киирбит

MAX мессенджергэ Саха сиригэр «Эрэгийиэн биир кэлим сервиһэ» чат-бот үлэлээн саҕалаата. Бу чат – өрөспүүбүлүкэ судаарыстыба уонна уопсастыба суолталаах онлайн-өҥөлөрүгэр (сервистаригэр) киирэр сүрүн цифровой «аан» тэҥэ суолталаах. Сигэтэ бу баар: https://max.ru/sakhagovbot.

Бу сонун ньыма, чопчута, чат-бот, олохтоохтор наадалаах иһитиннэриини кэбэҕэстик булалларыгар уонна цифровой өҥөлөрү судургутук туһаналларыгар, ирдэнэр иһитиннэриини, баар кыаҕы сэттэ сиринэн кэрийэ сылдьан көрдөөбөккө, биир сиртэн булалларыгар туһалыахтаах.

Чат-бот сыыппара эйгэтигэр оҥоһуллар эрэгийиэн өҥөлөрүн  биир бэлиэ долбуура (витрината) буолар. Чат-бот көмөтүнэн туһанааччылар официальнай саайка түргэнник көһөр, анал чат-боттарынан туһанар, тэттик-сыһыарыыны арыйар, биэдэмистибэ официальнай ханаалыгар кэбэҕэстик киирэр эбэтэр толорууну эрэйэр электроннай халыыптары (форманы) судургутук толорор кыахтаныахтара диэн, суоттаналлар.

«Билигин сыыппара эйгэтигэр оҥоһуллар өҥөлөр бары биир сиргэ түмүллүбүттэрэ олус табыгастаах. Урут наадалаах саайтары уонна чат-боттары тус-туспа көрдүүр буоллахпытына, билигин наадалаах өҥөҕө биир сервиһинэн түргэнник көһөр кыахтанныбыт.  Иһитиннэриини көрдүүргэ бириэмэни ыыппакка, тугу наадыйаргын судургутук булар буолабыт», — диэн Дьокуускай куорат олохтооҕо Николай Васильев санаатын үллэстибит.

 

“Цифровой өҥөнү сайыннарыы уонна олохтоохтор судаарыстыба өҥөлөрүн судургутук туһанар усулуобуйаларын тэрийии – өрөспүүбүлүкэ тутуһар сүрүн хайысхаларыттан биирдэстэрэ. Кэлиҥҥи сылларга Саха сиригэр доруобуйа харыстабылыгар, социальнай өйөбүлгэ, судаарыстыбаннай өҥөлөрү оҥоруута уонна гражданнар былаас уорганнарын кытта алтыһыыларыгар аныгы цифровой өҥө күүскэ өтөн киирдэ”, –  диэн «Республика Саха (Якутия) телеграм-ханаал иһитиннэрэр.