Дьоһун-мааны Сахабыт сирин олохтоохторо!

Олоҥхо ыһыаҕа – саха дьонун тылынан уус-уран баайын, хас эмэ түҥ былыргы үйэлэри уҥуордаан кэлбит сүҥкэн айымньытын – олоҥхону харыстыыр, сайыннарар уонна киэҥник тарҕатар сүрүн соруктаах. 19-с төгүлүн ыытыллар Олоҥхо ыһыаҕа Саха сиригэр биллэриллибит Култуура сылыгар сөп түбэспитэ эмиэ көдьүүстээх уонна туһалаах буолуоҕа.

Бу кэмнэргэ Кэбээйи сиригэр-уотугар ыытыллар Олоҥхо ыһыаҕар бэлэмнэнии үлэтэ күргүөмнүк уонна киэҥ хайысхалаахтык бара турар – саҥа социальнай дьиэ-уот тутуллар, култуура тэрилтэлэрин матырыйаалынай-тэхиньиичэскэй базалара тупсарыллар, суол-иис оҥоһуллар.

Бу сылга ыытыллар Олоҥхо ыһыаҕа – өрөспүүбүлүкэҕэ собус-соҕотох улахан тэрээһин. Ыһыахпытыгар сиэр-туом тутуһан Үрдүкү Айыылартан “Араҥаччылаа, арчылаа, харыстаа!” диэн бука бары көрдөһүөхпүт турдаҕа.

Хаһан баҕарар ыһыах үрдүк таһымнаахтык тэриллэн барара дьон-сэргэ өйөөһүнүгэр уонна көмөтүгэр тирэҕирэр диэн өйдөбүлүнэн салайтаран, олохпут биир улахан бэлиэ бырааһынньыгын үөрүүтүн күргүөмүнэн, ким төһөнү уйунарынан хомуйан, Олоҥхо ыһыаҕын фондатыгар ыытыаххайыҥ диэн ыҥырабыт. Эһиги көмөҕүт Саха сирин дьонун өй-санаа баайын чөлгө түһэриигэ биллэр-көстөр бэлэх буолуо диэн эрэнэбит.

Аркадий Михайлович Алексеев, СӨ Ытык гражданина

Петр Иванович Захаров, СӨ Ытык гражданина

Николай Макарович Парников, СӨ “Хотугу сулус” уордьан кавалера