Дмитрий Садовников: Уларытыахха наада!

Бэҕэһээ «Киин куорат» Дьокуускайга Култуура уонна сынньалаҥ пааркатыгар 10 км усталаах сүүрэр суолу тутар былааннаахтарын туһунан суруйуутугар ааҕааччылар паарка биир сүрүн кыһалҕатын маннык ыйбыттара.

Кырдьыга, куорат баар суох Култуура уонна сынньалаҥ пааркатыгар сүүрэр суол да, туалет да наадалар. Бүгүн манна баһылык Дмитрий Садовников ыалдьыттаан, кэккэ түмүктэри оҥорбутун бэйэтин МАХ ханаалыгар суруйда. Ол курдук, баһылык куорат пааркатын туруга быстар мөлтөҕүн, онон сибээстээн нэһилиэнньэттэн саҕалаан хонтуруоллуур уорганнарга, уопсастыбанньыктарга тиийэ үҥсүүлэр киирэллэрин бэлиэтиир. «Киирэр үҥсүү сүрүннээн туалекка сыһыаннаах. Баар туалеттарыгар киһи киириэх буолбатах. Аҕыйах хонуктааҕыта бүтүн куораттааҕы субуотунньук буолбут сибикитэ көстүбэт – территория устунан бөх, тутуу матырыйаала», – диэн ойуулуур Садовников баар балаһыанньаны.

Биир тылынан, Култуура управлениетын уонна Куорат пааркаларын дирекциятын үлэлэрэ саҥа салалтаны астыннарбатах. «Эбийиэкпин элбэҕэ бэрт», «икки эрэ дворниктаахпыт», «үбүлээһин суох», «сезон сабылыннаҕына олохтоохтук хомунуохпут» диэн ааһыныылары саҥа салалта ылымматах.

«Бу – эбэтэр салалта баар кыһалҕаны кыайан арааран көрбөт буолбут, эбэтэр эппиэтинэһи букатыннаахтык сүтэрии. Култуура уонна сынньалаҥ паарката үҥсүү төрүөтэ буолбакка, нэһилиэнньэ сөбүлээн сынньанар сирэ буолуохтаах, систиэмэни уларытыахха наада" диэн туран, Дмитрий Садовников эриэйдэ түмүгүнэн баһылыгы солбуйааччы Евгений Пермяковка территорияны өрө тардыыны кытаанах хонтуруолга ыларга уонна үлэ бэрээдэгин тосту уларытарга сорудахтаабыт.