Дмитрий Садовников социальнай эбийиэктэр тутууларын билистэ

Дьокуускай сайдыытын маастар-былааныгар олоҕуран, билигин киин куоракка 7 култуура  уонна 7 спортивнай эбийиэк тутулла тураллар.

Баһылык бэлиэтээбитинэн, үлэни миэстэтигэр билсии вице-премьер Сергей Местников кыттыылаах буолан ааспыт мунньах салгыыта буолла. Дмитрий Садовников тутуу үлэтин көрдө-иһиттэ, тутааччылары кытта сирэй көрсөн араас боппуруостары быһаарыста, соруктары чопчулаата.

Спортивнай-чэбидигирдэр комплекс (68-с кыбартаал)

Тутааччы - «Прометей» СЗ ХЭТ. Эбийиэк тутуллар сирин иэнэ  2,5 тыһ. кв. м., тутуллар эбийиэк уопсай иэнэ 1,8 тыһ. кв. м.

Бырайыакка киирбиттэр: хореография уонна чэбдигирдэр физкультура саалалара, тренажердаах саалалар, саахыматынан, дуобатынан дьарыктанар кабинеттар, үлэһиттэргэ аналлаах хостор.

Бастакыта бу комплекс Пригороднайга тутуллуохтааҕа, ол эрэн анаммыт сирэ ууга барара биллибитэ. Онон сирин талыыга билигин улахан болҕомто ууруллар. Баһылык тутааччы тэрилтэ олохтоох дьаһалтаны кытта биир ситимнээхтик үлэлииригэр сорук туруорда, судаарыстыбаннай экспертизаны ааһыы булгуччулааҕын тоһоҕолоото.

“Центр эстетических видов спорта” (Бүлүү суолугар)

Бүлүү суолун 3 км тутулла турар эбийиэк. Манна 800-тэн тахса чааһынай гараастар тураллар, бары тиэллиэхтээхтэр, сир босхолонуохтаах. Гараастары бас билээччилэргэ атын сиргэ көһөр кыах бэриллиэхтээх.

Оҕо искусствотын оскуолата (паарка кэннигэр)

Октябрьскай уокурукка тутуллар Оҕо искусствотын оскуолата биир симиэнэҕэ 100 оҕону үөрэтиэхтээх. Эбийиэк уопсай иэнэ 1,8 тыһ. кв. м. Манна ититии уонна уу ситимнэригэр холбонуу тула кэпсэтии таҕыста.

«Пионерский» олорор дьиэ комплекса (маневреннай пуонда)

Баһылык субуотататааҕы хонтуруоллуур айанын бүтэһик аадырыһынан тутулла турар маневреннай пуонда уопсай дьиэтэ буолла. Тутааччы тэрилтэ үбүлээһин кыһалҕатын көрсүбүтүн үллэһиннэ. Баһылык Олохтоох дьаһалта тутааччу кирэдьиит биэрэр бааны кытта сыһыаныгар көмөлөһөр кыахтааҕын, өйөбүл буоларга бэлэмин биллэрдэ.