Дмитрий Садовников Новокарьернай уул., 43/3 уопсай дьиэтин олохтоохторун кытта көрүстэ

Санатар буоллахха, аҕыйах хонуктааҕыта Куораттааҕы ыксаллаах быһыыга-майгыга хамыыһыйа хас биирдии хоһу киһи олороругар сөбө суоҕунан билинэн, олохтоохторго маневреннай  пуондаттан олорор сир бэриллэрэ наадатын ыйбыта.

Росреестр чахчытынан, дьиэ 30 кыбартыыралаах, ол иһигэр: 8 – ДОСААФ балаансатыгар турар, 22 – биирдиилээн дьон бас билиитэ.

 

Сорох ыаллар эрдэ көспүттэр, атын олорор сирдээхтэр, маневреннай пуондаттан аккаастаммыттар эмиэ бааллар. Эрдэ куорат баһылыга Дмитрий Садовников бэлиэтээбитинэн, дьиэ төһө да муниципальнай бас билии буолбатаҕын үрдүнэн, куорат салалтата нэһилиэнньэҕэ куттал суох буолуутун хааччыйар эбээһинэстээх.

Бүгүн баһылык Дмитрий Садовников уопсай дьиэни бас билээччилэри кытта көрсөн, Территориялары кэлимник сайыннарыы (КРТ) былаанын быһаарда. Чуолаан бу дьиэ олохтоохторун кытта сөбүлэҥ түһэрсэн, номнуо 2027 сылга көһөрүллүү былааныгар киирэр кыах баарын санатта. «Биллэн турар, барыта хайдах бэдэрээтчит түбэһэриттэн уонна төһө түргэнник тутарыттан тутулуктаах. – диэн Дмитрий Садовников бэйэтин МАХ ханаалыгар суруйда. – Хайдаҕын да иһин, билигин бу дьиэҕэ олорор сэрэхтээх. Ханнык баҕар түгэҥҥэ киһи үөйбэтэҕэ буолар кутталлаах. Онон дьиэни инженернэй коммуникациялартан араарарга күһэллэбит».