Дмитрий Садовников кыра итэҕэстэри дириҥии иликтэринэ тутатына көннөрөрү ордорор

Бэрэбиэркэнэн түөрт уокурук хабылынна - Губинскай, Гагаринскай, Центральнай, Октябрьскай. Оробуочай бөлөх бу чэрчитинэн «Триумф» таһын, Сайсары эбэ кытылын, Хабаров уулуссатын, Орджоникидзе болуоссатын, «Обнаженные сердца» сквер, Кыайыы пааркатын, «Ворота Якутска» эбийиэк, Ю.А. Гагарин аатынан сквер туруктарын билистэ.

Ю.А. Гагарин аатынан сквери тупсарыынан дьарыктанар «Вертикаль» ХЭУо бэрэстэбиитэлэ иһитиннэрбитинэн, тутуу матырыйаала кэлэн сытар, үлэ балаҕан ыйын 1 күнүн эргин түмүктэниэхтээх.

Орджоникидзе уулуссатын хаттаан оҥоруу түмүктэнэн эрэр, управа үлэһиттэрэ тус бэйэлэринэн субуотунньуктаан көмөлөһөллөр. Алдьаммыт бордюрдар, эргэрбит кырааска уопсай көстүүнү буортулууллара бэлиэтэннэ. «Ворота Якутска» арт-эбийиэк билиитэлэрэ алдьаммыттар, былаһаакката оҕо оонньууругар сэрэхтээх буолбут.

Эмиэ аэропортан тахсыыга турар «Якутск» сурук уонна Кыайыы паарката мөлтөх туруктаахтара ыйылынна. Сайсары кытылын аспаала хотойбут, онон-манан арматура дьардьамалара быган сыталлар. Ойуунускай уулуссатын өрөмүөнэ уһаан, бөх тиэйиллибэккэ сытара бэлиэтэннэ.

Маннык эриэйдэлэри саҥа баһылык тиһигин быспакка ыытан, элбэх харчыны эрэйбэт итэҕэстэри тутатына көннөрөр былааннаах, диэн Олотоох дьаһалта пресс-сулууспата иһитиннэрэр.