Дмитрий Садовников инаугурацията сарсын былааннанар

Санатар буоллахха, бүгүн, от ыйын 20 күнүгэр, Куорат дууматын уочарата суох XXVII сессията Дьокуускай куорат саҥа баһылыгын – бу иннинэ СӨ Бырабыыталыстыбатын Бэрэссэдээтэлин бастакы солбуйааччыта Дмитрий Садовниковы талла.

Сессияҕа 29 дьокутааттан 25 кыттыыны ылла. Онтон 23 дьокутаат бэйэтин куолаһын Дмитрий Садовников туһугар биэрдэ, биир дьокутаат утарда, биир – куоластааһыҥҥа кыттыыны ылбата.

Дмитрий Садовников үлэтин саҥа хамаанданы тэринииттэн саҕалыыр былааннааҕын, ол эрээри кинилэри куорат олохтоохторо үчүгэйдик билэллэрин иһитиннэрдэ. Маны сэргэ кини Олохтоох дьаһалтаҕа өссө Илья Михальчук саҕаттан үлэлээн саҕалаабытын бэлиэтээтэ.

Садовников Дмитрий Дмитриевич:

1971 с. алтынньы 20 күнүгэр Саха АССР Орто Халыма улууһун Налимскай бөһүөлэгэр төрөөбүт;

2002 с. – М.К. Аммосов аатынан Саха судаарыстыбаннай университетын историк идэлээх бүтэрбит;

2015 с. – Арассыыйа Бэрэсидьиэнин иһинэн Норуот хаһаайыстыбатын академиятын «судаарыстыбаннай уонна муниципальнай салайыы» салаатын бүтэрбит;

 

Үлэлээбит миэстэлэрэ:

1989 с. оскуола кэнниттэн Орто Халыма оройуонун «Алаһыай» сопхуоһугар оробуочайынан үлэлээбит;

1989-1992 сс. – Сэбиэскэй Аармыйа кэккэтигэр сулууспалаабыт;

1992-1997 сс. – Орто Халыма Сыбаатай нэһилиэгэр хачыгаарынан үлэлээбит;

1997-2001 сс. – М.К. Аммосов аатынан СГУ устудьуона. Үөрэнэр кэмигэр 12№-дээх уопсай дьиэ дворнигынан үлэлээбит;

2001-2002 сс. – М.К. Аммосов аатынан СГУ үөрэх-методика управлениетыгар 1 категориялаах методист;

2002-2003 сс. – СГУ Студгородок дириэктэрин солбуйааччы;

2003-2005 сс. – Дьокуускай к. Ыччат үлэ биржатын дириэктэрэ;

2005-2006 сс. – Дьокуускай куорат Олохтоох дьаһалтатын Ыччат политикатыгар, физическэй култуураҕа уонна спорка управлениетын начаалынньыга;

2006-2012 сс. Сайсары уокуругун управатын салайааччыта;

2012-2018 сс. Дьокуускай куорат баһылыгын бастакы солбуйааччы;

2018-2021 сс. Олох-дьаһах, хомунаалынай хаһаайыстыба уонна энергетикэ миниистирэ;

2021 сылтан – СӨ Бырабыыталыстыбатын Бэрэссэдээтэлин Бастакы солбуйааччы.

Дмитрий Садовников 5 сылга болдьохтоон талылынна. Ол эбэтэр 2032 сылга бэлиэтэр Дьокуускай куорат төрүттэммитэ 400 сыллаах үбүлүөйэ кини быһаччы салалтатынан ыытыллар. Саҥа мэр бэлиэтээбитинэн, сүрүн болҕомтону үөрэх, доруобуйа харыстабылын, хомунаалынай хаһаайыстыба, чөл олох, спорт эйгэлэригэр уурар былааннаах. Аһаҕас кэпсэтиигэ уонна кириитикэҕэ бэлэмин биллэрдэ.