Дмитрий Садовников бастакы мунньаҕын ыытта

Баһылык бастакы уочарат турар соруктары чопчулаата уонна уу таһыма үрдээһинин тула кэпсэтиини ыытта. Гидрологическай сулууспалар иһитиннэрэллэринэн, өрүстэр ууларын таһыма үрдүү турар.

“Өлүөнэ өрүскэ уу таһыма үрдээн киин куорат сиригэр баар нэһилиэнньэлээх пууннар ууга барыталаан эрэллэр. Ордук сэрэхтээх балаһыанньа Табаҕа, Хатас, Пригороднай, Тулагы уонна Кангалаас сэлиэнньэлэригэр үөскээтэ. Куорат бары сулууспалара ураты бэлэм буолуу эрэсиимигэр көстүлэр. Суукканы эргиччи кэтээн көрүү ыытыллар. Билиҥҥи сүрүн сорукпут – чааһынай дьоҥҥо уонна куоракка хоромньуну таһаарыа суохтаахпыт,” – диэтэ Дмитрий Дмитриевич.

Маны тэҥэ баһылык дьаһалта кэлэктиибин киин куоракка олоххо киирэр бырагыраамалары салгыы үлэлэтиигэ тэтими ыһыктыбакка баран иһэргэ ыҥырда.

Мунньахха баһылык дьаһалта аппаратын саҥа салайааччытын Антон Артемьевы билиһиннэрдэ. Киниэхэ дьаһалта үлэтин тэрийиини, соруктары толорууну хонтуруоллуур, дьаһалта араас салааларын үлэлэрин сааһылыыр эбээһинэс сүктэриллэр. Антон Артемьев бу иннинэ СӨ Бырабыыталыстыбатын бэрэссэдээтэлин солбуйааччы секретариатын салайбыт.

Маны тэҥэ Каадыр уонна муниципальнай сулууспа управлениетын салайааччытынан Туйаара Унарова ананна. Кини Олохтоох дьаһалтаттан саҕалаан өрөспүүбүлүкэ бырабыыталыстыбатыгар тиийэ үлэлээбитэ.

Баһылык мунньахха эппитинэн, өссө да атын анааһыннар бу күннэргэ биллиэхтэрэ. “Реформалар куорат олохтоохторо уларыйыылары кэтэһэр салааларыгар барыахтара”, - диэтэ Дмитрий Садовников.