Дмитрий Садовников: «Мин соругум – бу кыһалҕалары туоратарга нэһилиэнньэни уонна урбаанньыттары ситимнээһин»

Дьокуускай куорат территорияларын кэлимник сайыннарыыга (КРТ) бүгүҥҥү күҥҥэ 12 бырайыак үлэлиир.

Түһэрсиллибит дуогабардарынан 288, ол иһигэр 215 хаарбаҕынан официальнайдык билиниллибит дьиэни көтүрэр уонна 1,2 мөл. кв.миэтэрэ кэриҥэ иэннээх саҥа олорор дьиэлэри тутар сорук турар.

Оробуочай бөлөҕү куорат 69-с кыбартаалыгар үлэлиир «СЗ Проф-Строй» ХЭУо дириэктэрэ Алексей Яковлев көрсөн, уунан, уотунан хааччыйыы боппуруостарыгар Олохтоох дьаһалта өйөбүлэ наадатын ыйда.

85-с кыбартаалга Станислав Сивцев салайааччылаах «СЗ Высота» ХЭУо үлэлиир. Кини бэлиэтээбитинэн, манна Лонгинов, Чайковскай, Новокарьернай уулуссалар дьиэлэрин олохтоохторо көһөрүллүөхтээхтэр. Онуоха анаан 1 890 кыбартыыра тутуллуохтаах. Тутуу былаһаакката11 тыһ. кв.м иэннээх.

Анатолий Заболоцкай салайааччылаах «СЗ СТК-2023» хампаанньа «Город в парке» түөлбэни тутар. Манна 13 элбэх кыбартыыралаах дьиэ тутуллара былааннанар. Ону сэргэ чугаһынан ФТЛ, Оҕо искусствотын оскуолалара, уһуйаан баар буолуохтара. Санатар буоллахха, ФТЛ дьиэтэ 2027 сыл бүтүөр диэри кырата 550 миэстэлээх тутуллан бүтүөхтээх.

«Ленские высоты» оройуоҥҥа эмиэ тутуу былаан быһыытынан барар. Оробуочай бөлөх маны сэргэ 145-с. 43-с кыбартааллары, Борисовка-3 миэстэлэрин бэрэбиэркэлээтэ.

Сырыы түмүгүнэн Дмитрий Садовников хас биирдии тутааччыга тустаах кыһалҕалар баалларын уонна ол урукку сылларга, эрдэтинэ, болҕомтоҕо ылыллыбатахтарын түмүгэр үөскээбиттэрин бэлиэтээтэ.

«Баһылык быһыытынан мин соругум – бу кыһалҕалары туоратарга нэһилиэнньэни уонна урбаанньыттары ситимнээччи буолуу», – диэтэ Дмитрий Садовников.

Бэлиэтээн эттэххэ, Куорат дууматыгар б.дь. ыам ыйыгар буолан ааспыт Баайга-дуолга уонна сир сыһыаннаһыыларыгар сис кэмитиэт мунньаҕар Куораты тутууга уонна архитектураҕа департамент салайааччыта Иван Гуляев эбии үс маастар-былааны оҥорор сорук турарын иһитиннэрбитэ: 204-с уонна 211-с кыбартааллар сорох чаастара, Владимировка, Табаҕа уонна Эргэ Табаҕа территориялара, Марха Газовиктар уонна Кирзавод оройуоннара. Ону таһынан 111-с, 112-с, 75-с, 84-с, 167-с, 171-с, 11-с, 68-с кыбартааллар дьон олорор түөлбэлэрин, Крестьянскай ырыынак дьон олорор дьиэтэ суох эҥэрин, салгыы 86-с, 93-с кыбартааллар территорияларын кэлимник сайыннарыы былаана оҥоһуллуохтаахтар диэн.