«Диодорова. Сүүрүк утары» киинэ Азия бөдөҥ бэстибээлигэр кыттар

Режиссер Сандал Баишевы кытта бэстибээлгэ сүрүн оруоллары оонньообут Мария Иванова уонна Ирина Никифорова ыҥырыллыбыттар. Хомойуох иһин, Настя Диодорова бэйэтэ уонна кини тренерин оонньообут Татьяна Арнтгольц кэккэ биричиинэнэн бэстибээлгэ тиийбэт буолбуттар. 

АСЕАН бэстибээл куонкурус курдук буолабакка, ханнык эмэ тиэмэни чопчу талан култуурунай-сырдатар тэрээһин быһыытынан ыытыллар. Манна бастыҥ киинэни, бастыҥ артыыһы талбаттар, үгэс буолбут дьүүллүүр сүбэ диэн суох. Ол оннугар уопут атастаһыы, көрөөччүлэри кытта аһаҕас кэпсэтиилэр, ырытыһар төгүрүк остуоллар элбэхтэр. Азия киинэтин тула хорутуулаах кэпсэтии тахсар. Быйылгы бэстибээл киинэҕэ баар музыка уонна тыас-уус тиэмэтин тула буолара былааннаммыт.

Киинэҕэ Людмила Диодорованы СӨ үтүөлээх артыыһа Ирина Никифорова, Настя Диодорованы Өрөспүүбүлүкэтээҕи лицей 10-с кылааһын үөрэнээччитэ Маша Иванова оонньообуттара. Маша киинэ уһулларын саҕана 7-с кылааска үөрэнэрэ.

Киинэ билиэтинэн 48 мөл. 800 тыһ. солк. киллэрбитэ. “Кинопоиск” былаһааккатыгар 250 бастыҥ киинэ иһигэр киирэн сылдьар.