Димитриан Попов ыһыырынньыга

Александра Постникова, түмэл пуондатын үлэһитэ:

– 2027 сылга протоиерей Димитриан Дмитриевич Попов төрөөбүтэ 200  сылын бэлиэтиэҕэ. Аҕабыт 1850-с сылларга Ытык Күөлгэ кэлээт, саха ууһугар балаҕан уонна баанньык туттарбыта.

Таҥара дьиэтин иһинэн оскуола дьиэтэ-уота суох буолан, ол баанньыгын Ытык Күөллээҕи Преображенскай таҥара дьиэтигэр  биэрбитэ. Мантан Таатта бастакы үөрэхтээхтэрэ Алампа Соппуруонап, Г.К. Оросин, Р.Ф. Кулаковскай, П.И.Слепцов, ини-бии Николаевтар, о.д.а. тахсыбыттара.

Поповтар эһэлэрэ Димитриан Дмитриевич уонна сиэнэ Иннокентий Васильевич маска үчүгэйдик уһаналлара.  Ол курдук, таҥара дьиэтин иконостаһын, ис тээбиринин Димитриан аҕабыт бэйэтэ оҥороро. Кини удьурхайтан оҥорбут бытархай малы хаалыыр уонна сиэнэ Иннокентий Васильевич эдьиийигэр Татьянаҕа бэлэхтээбит холбуйалара Чөркөөх түмэлигэр  хараллаллар. Оттон сырдыгы-үөрэҕи саҕааччы Димитриан Дмитриевич Попов дьиэ кэргэнин ыһыырынньыгын 1948 сыллаахха худуоһунньук сыдьаана Николай Иванович Попов Тааттаҕа бастакы тэриллибит кыраайы үөрэтэр түмэлгэ бэлэхтээбитэ. Ыһыырынньык үрдүгэ – 15,7 см, олоҕун эргимтэтэ – 9,7 см. Туруору атахтара от-мас оһуорунан киэргэтиллибиттэр. Аҕабыт улахан сиэнэ, САССР норуодунай худуоһунньуга, саха былыргытын чинчийээччи, хаартыскаҕа түһэрээччи Иван Васильевич Попов эһэтин ыһыырынньыгын кумааҕыга уруһуйдаабыта биллэр.

Саха тылын тылдьытын олугун уурсубут, үөрэҕи-сырдыгы тарҕатааччы Димитриан Дмитриевич Попов аата сири сырдатар таҥара уотун кэриэтэ умуллубатын.