Дьиэ сууйааччы танцыһыттар

Ааспыт нэдиэлэҕэ танцыһыттар оскуола дириэктэриттэн сурук ыла-ыла чаастарын уһатан үҥкүүлүүллэрин туһунан суруйан турабын.

Аны туран, кэпсээнтэн кэпсээн диэбиккэ дылы, ыалым өссө биир түгэни ахтан ааста.

Үрдүкү кылаастарга саастаах ыалга (оҕонньордоох эмээхсин иккиэйэхтэр эрэ, оҕолоро суох эбит) тиийэн дьиэлэрин сууйан-сотон, сэргэхситэн, эбиитин бытыылка биэрэн үөрдэн-көтүтэн баран, ол дьиэни “куортамҥа” ылан “от души” үҥкүүлүүллэрэ үһү. Арааһа, оскуола танцыта эрдэ бүтэр буолан, онно сөп буолбакка тиийэллэр быһыылаах.

Кырдьаҕастар барахсаттар үөрэн сэгэйэн, оҕолор үҥкүүлүүллэрин ыскамыайкаларыгар олорон көрөллөр эбит. Уонна: “Ии, барахсаттар, наһаа да үчүгэйдэр”, – диэн өссө манньыйаллар, таптыыллар үһү. Бу үтүө үгэс диэххэ, улахан кылаастартан кэлбит. Кинилэр иннинээҕи выпустар эмиэ маннык дьиэ сууйан баран танцылыыллара үһү. Өссө биир соҕотох олорор эмээхсиҥҥэ тиийэрбит диэн кэпсиир. Кини эмиэ дьиэтин туран биэрэр эбит. “Манньатын” иһэн баран, утуйан хаалаахтыыра үһү.

Маныаха саамай кэрэхсэбиллээҕэ, “Уолаттарбыт хаһан да бэйэлэрэ арыгыны амсайбат,  испэт этилэр, наһаа үчүгэйдик үҥкүүлээн, оонньоон, махтанан баран тарҕаһарбыт”, – диэн кэпсээнин түмүктээбитэ.

Дьэ, үҥкүүһүт, үҥкүүнү таптыыр выпустар дии. Чахчыта да оннук, кылааһынан көрүстэхтэринэ, оскуола үбүлүөйдэригэр да сылдьан көрдөххө, олус эйэлээх, үҥкүүнү оройуттан туппут, ким да истиэнэни өйөөн турбат, киһи эрэ ымсыыра көрөр “оҕолоро” буолааччылар.