Дьиэ кыылын сөптөөхтүк тутуу эппиэтинэһин туһунан

СӨ Бырабыыталыстыбатын 01.08.2014 с. 237 №-дээх уурааҕынан «Саха Өрөспүүбүлүкэтин сиригэр-уотугар дьиэ кыылын тутуу быраабылалара» бигэргэммитэ. Быраабыла быһыытынан хас биирдии кыылы бас билээччигэ кыылы көрүүгэ-истиигэ, күүлэйдэтиигэ ирдэбиллэр олохтоноллор.

Дьиэ кыылын тутааччы тугу тутуһуохтааҕый:

- кыылы харайыы санитарнай-нормативнай нуормаларын уонна быраабылаларын кытаанахтык тутуһуохтаах, дьоҥҥо куттал суох буоларын хааччыйыахтаах, иитэр кыыла дьон сылдьар сирин киртиппэтин хонтуруоллуохтаах.
- дьиэ кыылын дьаарбатарга дьоҥҥо, атын кыылларга куттал суох буоларын, физическэй уонна юридическай сирэйдэр баайдара-дуоллара бүтүн буолуутун хааччыйыахтаах. Дьиэ кыылын күүлэйдэтэргэ анаммыт сирдэргэ эрэ харамайын дьаарбатыахтаах.
- Бэйэлэрэ бас билэр учаастактаах ыт хаһаайыннара учаастак толору оҕуруоттаммыт түгэнигэр эрэ ыттарын тэлгэһэлэрин иһигэр көҥүл ыытыахтарын эбэтэр ыт учаастактан тахсыбатын курдук баайыыга туруоруохтарын сөп.
- Ыты дьиэттэн, сабыылаах территорияттан уопсай тэлгэһэҕэ, уулуссаҕа таһаарарга томторуктанар (арҕаһыгар диэри 35 см кыра үрдүктээхтэртэн ураты), сигилитин, тутта сылдьарын хонтуруоллуурга сөптөөх уһуннаах быанан сиэтиллэр.
- Племенной сыаннаһа суох дьиэ кыылын наадыйыыта суох ууһуурун тохтоторго, кыыл ахсаанын туһата суох элбэппэт соруктаах стрелизациялатыахтаах.
- Сыллата дьиэ кыылын бэтэринэриийэҕэ илдьэн регистрациялатыллыахтаах, ииримтийиини утары быһыыны туруортарыахтаах. 

Нэһилиэнньэлээх пууннарга көрүүтэ-истиитэ суох сылдьар ыттар (ол иһигэр моойторуктаахтар кытта) тутуллаллар уонна Дьокуускайдааҕы көрүүтэ-истиитэ суох кыыллары быстах кэмҥэ тутар пууҥҥа тиэрдиллэллэр. Хаһаайыннаах ыт түбэһэр түгэнигэр, хаһаайын ытын тутуу, таһыы уонна көрөн-харайан туруу ороскуотун толору уйунара ирдэнэр. 
Үөһэ ыйыллыбыт Быраабылалары кэһии иһин кыылы иитээччилэр «СӨ административнай быраабы кэһиигэ Кодексатын» 5.4 ыстатыйатынан административнай эппиэтинэскэ тардыллыахтарын  сөбүн СӨ бэтэринэриийэҕэ департамена санатар. 

Уокуруктааҕы дьаһалта пресс-сулууспатын иһитиннэриититтэн