Дьиэ кэргэнинэн – «Сулуска»

«Солнце, воздух и вода – наши лучшие друзья!» диэн этиини аҕам саастаах дьон олох пионер сааспытыттан аргыс оҥостон улааттахпыт. Кырдьык, чаҕылыйа тыгар күммүт, сибиэһэй салгыммыт, эппитин-сииммитин чэбдигирдэр ыраас уу – бу барыта доруобуйаҕа эргиччи туһалааҕа биллэр.

Кэргэммин кытта хас да сыл «Самородок» бассейҥҥа сөбүлээн сырыттыбыт. Оттон быйыл сонун, саҥа сиргэ «Сулус» физкултуурунай-чэбдигирдэр комплекска анаан-минээн баран кэллибит. Бэйэм бу манна сэтинньи ыйга бастакыбын сылдьан турардаахпын. Онно комплекс өрөмүөн кэнниттэн арыллан үлэлээн эрэр кэмэ этэ.

Бастаан «ТимирGym» диэн тренажернай саалаҕа киирдибит. «Дьөһөгөй бэлэҕэ» диэн тыллары уонна ааппытын этээппитин кэннэ тута аһардылар. Тохсунньу саҥатыгар «Өрөгөй» уораҕайыгар улахан сүүйүүлээх оонньуу буолбута. Онно лотерея билиэтин активациялаабыт киһи бу саалаҕа биир ый босхо сылдьыан сөп эбит. Дьарыктанааччылары сыныйан көрбүтүм, бары – эдэр дьон.

Администратор Артем Алексеев маннык кэпсээтэ:

– Бу «Сулус» үлэҕэ киирбитэ хас да сыл буолла. «ТимирGym» саалаҕа күнү быһа дьон кэлэр. Киэһэлик өссө элбииллэр. Лотерея билиэтинэн 200-тэн тахса киһи суруйтарда. Сотору атын сиргэ көһөр былааннаахпыт.

Аны 5 чаастан бассейҥҥа сөтүөлээтибит. 6 дорожка баарыттан сороҕор харбааһын секциятыгар сылдьар оҕолор дьарыктаналлар эбит.

Таҥас уларыттар сиргэ икки дьахтары кытта кэпсэттим. «Сөбүлээн сылдьар сирбит. Бассейн уута сылаас. Үлэһиттэр эйэҕэстэр. Табыгастаах усулуобуйа барыта баар», – диэтилэр.

Баттах куурдуна турар кыргыттар үөрэ-көтө хаартыскаҕа түһэргэ сөбүлэстилэр. 30-с нүөмэрдээх оскуола үөрэнээччилэрэ Лилиана, Алиса харбааһын секциятыгар нэдиэлэҕэ иккитэ, сороҕор түөртэ сылдьаллар. Бу дьарыктарын олус сөбүлүүллэрэ тута көстөр. «Саайтка тахсыаххыт», – диэбиппэр, харахтара чаҕылыһа түстэ, олус сэҥээрдилэр, махтаннылар.

Аны гардероб таһыгар биир дьиэ кэргэни бэлиэтии көрөн, кинилэрдиин билистим. Хата, олус сэргэх дьон буолан биэрдилэр. Бу бассейҥҥа кинилэр 10-с сырыылара эбит. Ыал аҕата – Владимир Иннокентьевич Барашков. Ийэлэрэ Варвара Гаврильевна Прибылых маннык кэпсээннээх буолла:

– Биһиги Тулагы олохтоохторобут. Үс оҕолоохпут: Талбан, Дуолан, Айыына диэннэр. Бүгүн бу биир уолбутун уонна мин быраатым Айсены илдьэ кэллибит. «Сулуска» бассейҥҥа, өссө сороҕор катокка сылдьабыт. Дьиэ кэргэнинэн бары чөл олоҕу тутуһарга кыһаллабыт.

Бу Тулагы курдук тэйиччи сиртэн куоракка анаан-минээн оҕолорун чэбдигирдэ, эт-хаан өттүнэн сайыннара, үтүө үгэстэргэ иитэ сылдьар кэргэнниилэри олус биһирии, хайҕыы көрдүм. Атыттарга үтүө холобур оҥостуохпун баҕардым. Маннык дьиэ кэргэн элбии турара буоллар, олус да үчүгэй буолуо этэ.

«Сулус» физкултуурунай кииҥҥэ таһаарыылаах үлэни, ситиһиилэри баҕарабын!