Дьиэҕэ куоска баар буоллаҕына

Куоска киһи уйулҕатыгар маннык үтүө дьайыылардаах эбит:

Чуумпуруу уонна куттал суох буолуута. Дьиэҕэ куоска баар буоллаҕына киһи чуумпурар уонна бытаарар эбит. Куоска бытааннык хамсанара, тыынара, биир сиргэ таалалаан сытара – барыта киһи уйулҕатын уоскутар айылгылаах.

Тугу да ирдээбэт ыраас таптал. Куоска киһиттэн тугу да ирдээбэт. Кини көннөрү аттыгар баара сылаас иэйиини үөскэтэр.

Тыла суох ситим. Куосканы кытта наар кэпсэтэ сылдьар наадата суох, кинини кытары саҥата суох иһийиэххэ сөп. Хаһаайына санаата түстэҕинэ, хомойдоҕуна куоска билэр, таайар, аттыгар кэлэн сытар. Аһара сылайбыт, тыҥаабыт буоллаххытына чугаһаабакка кэтээн көрүөн сөп.

Үчүгэй үгэстэр төрүөттэрэ. Сарсыарда туран уунаҥныыра, ааҥҥа утары сүүрэн кэлэн көрсөрө, киэһээ тугу эрэ “олоҥхолуура” – күннэтэ хатыланар үгэс быһыытынан киһини уоскуталлар.

Түгэни сыаналыырга үөрэтэр. Куоска күн сардаҥатын сырсарын, күҥҥэ сыламныырын көрөн киһи түгэни, бу билигин баары сыаналыы үөрэнэр.

***

Куоска баар дьиэтиттэн үөн-көйүүр, кутуйах тэскилиир. Куоскалаах дьиэ кэргэн эт-хаан өттүнэн хамсаныыта элбиир, тэҥҥэ оонньоһор буоллахтарына – бэйэтэ туспа сэрээккэ.  Күннэтэ куосканы имэрийэн күүрүүнү намтатабыт.

Норуот уос номоҕор этиллэринэн, куоска баар дьиэтэ куһаҕан тыынтан харысхаллаах буолар. Куоска дьиэҕэ ситиһиини уонна байылыат олоҕу түстүүр. Оттон сорох норуоттарга дьиэҕэр куоска баар буоллаҕына абааһылар, хара дьайдар уонна куһаҕан санаалаах дьон тумнан ааһаллар.