Диабет ыарахан көрүҥүнэн ыалдьыы 64% аччаабыт

Статистика көрдөрөрүнэн, ыараханнык ыалдьыы ахсаана 64,3% аҕыйаабыт. Бу Арассыыйа бэрэсидьиэнэ Владимир Путин көҕүлээһининэн ыытыллыбыт “Уһун уонна көхтөөх олох” национальнай бырайыагы олоххо киллэрбитинэн кыалынна.

Сыл сүрүн ситиһиилэрэ:

• Диагностика: Гликированнай гемоглобин анаалыһын ахсаана 30% элбээбит, медицинскэй чинчийиилэр кэмигэр 764 саҥа ыарыһах булуллубут.

• Кыаммат бөлөхтөрү өйөөһүн: 494 хат дьахтар уонна 320 оҕо босхо тохтоло суох глюкоза мониторинын систиэмэтинэн хааччыллыбыт.

• Үөрэтии: “Диабет оскуолаларыгар” 8000-ча кэриҥэ киһи үөрэҕи ааспыт (1,5 төгүл элбээбит).

• Эмтэр: 25 000-тан тахса ыарыһах босхо эмп ылбыт. 2025 сылга ырысыаптарга бүддьүөт 268,8 мөл. солкуобай.

Саха сирин Ил Дархана Айсен Николаев чэпчэтиилээх хааччыйыы суолтатын тоһоҕолоото: 2026 сылга бу сыалларга бүддьүөт 1,2 млрд солк. улаатан, рекорднай 3,8 млрд солк. буолар.