Демография кыһалҕата таарыллыбыт

Докумуоҥҥа “корпоративнай демографияны өйүүр кыһыл көмүс стандарт”  дэнэр оҕолоох үлэһиттэри өйүүргэ, дьиэ кэргэн сыаннаһын бөҕөргөтөргө туһуламмыт дьаһаллар киирбиттэр. Бу маннык стандарт РФ Бэрэсидьиэнин иһинэн Демография уонна дьиэ кэргэн бэлиитикэтин судаарыстыбаннай бэлиитикэтин олоххо киллэриигэ үлэлэһэр Сэбиэт мунньаҕар 2026 сыл ыам ыйыгар бигэргэнэн турар. Саха сирэ ону тутуу баттаһа, оннук корпоративнай демографическай стандарды олоххо киллэрэргэ ылсыбыт.

«Хас биирдии социальнай эппиэтинэстээх хампаанньа дьиэ кэргэн, ийэ буолуу уонна оҕо аймаҕы өйүүр хайысхаҕа кыттыахтаах. «ГРК «Западная» атын хампаанньаларга холобур буолуо уонна корпоративнай демографическай бэлиитикэни олоххо киллэриигэ инники күөҥҥэ сылдьыа диэн эрэнэбин», – диэн Ил Дархан бэлиэтээбит.

Түһэрсиллибит сөбүлэҥҥэ этиллэринэн, хампаанньа үлэһиттэрэ үһүс уонна онтон кэлэр оҕолорун төрөттөхтөрүнэ 1 мөлүйүөн солкуобайдаах өйөбүл үп төлөнөр буолуоҕа. Ону тэҥэ, элбэх оҕолоох үлэһиттэр оҕолоругар сайыҥҥы сынньалаҥнарын уонна мэдиссиинэҕэ баҕа өттүнэн страховкаланыы (ДМС) полис сууматын аҥаарын толуйуу, оҕо төрөөтөҕүнэ уонна бастакы кылааска киирдэҕинэ төлөбүрдээх өрөбүл күннэри олохтооһун, хат уонна оскуола иннинээҕи саастаах оҕолоох үлэһиттэргэ табыгастаах усулуобуйаны тэрийии, “Оҕо хоһун” үлэлэтии киирбит.

Дмитрий Толоконников социальнай бырагыраамаларын тупсаран иһэргэ үлэлэһэллэрин, хабар хайысхатын хаҥатар соруктаахтарын үллэстибит.

«Западная»  ГРК АУо диэн — сиртэн туһалаах баайы хостуурга идэтийбит хайа-руда хампаанньата. Тэрилтэ сүрүн дьарыга – сир баайын хостуур учаастактары баһылааһыны уонна хайа үлэлэрин кытта сибээстээх.

Олохтоох нэһилиэнньэ бу курдук социальнай хайысхалаах бырагыраамалардаах, демография хайысхатыгар үлэлэһэр бырамыысыланнас тэрилтэлэригэр кыайа-хото үлэҕэ киирэрэ, араас суол өйөбүлү туһанар кыахтанара буоллар бэрт буолуо эбит.