ДЬЭДЬЭН САРГЫ

Бар дьоно Светлананы пааспарга киирбит аатынан буолбакка, “Саргылаана” диэн ааттыыллар эбит. Дьэдьэн кэллиэксийэтин мунньууну 2000 сыллардаахтан саҕалаабыт.

– Биһиэхэ Хадаҥҥа сайын аайы дьэдьэн наһаа үүнэр – “дьэдьэннээх Хадан” диэн аатырабыт.  Быйыл Сунтаарга дьэдьэн олус үчүгэйдик үүннэ. Бары ирээппитин булунан үөрдүбүт-көттүбүт.

Саамай сөбүлүүр сирим аһын хомуйарбын да, барыанньалыырбын да сөбүлүүбүн. Дьиэлээхтэрим эмиэ дьэдьэни наһаа сөбүлүүллэр. Кэргэмминиин үс оҕолоохпут – игирэ кыргыттары кытта биир уоллаахпыт. Оҕолорум бары туспа ыаллар, 9 сиэннээхпит.

Дьэдьэн ойуулаах иһити, сервизтэри, таҥаһы-сабы, туттар тэриллэри, сувенирдары бэйэм атыылаһабын, сороҕор сакаастаан эҥин ылабын. Уонна чугас дьонум, дьүөгэлэрим, табаарыстарым ыалдьыттыы кэллэхтэринэ хайаан да “дьэдьэннээх” кэһиилэнэллэр. Дьэдьэн ойуулаах тугу эрэ көрдүлэр да, миигин саныыллар үһү. Ол аайы наһаа үөрэбин, ким тугу хаһан биэрбитин барытын өйдүү сылдьабын, харахпын быһа симэн баран тутан көрөөт кэпсиэхпин сөп.

Ханна да тиийдэрбин аан бастакынан дьэдьэннээх сувениры, иһити-хомуоһу, таҥаһы көрдүүбүн, дьиэбэр хайаан да илии тутуурдаах кэлэбин.

Дьэдьэннээх бижутерияларбын сакаастаан оҥотторобун. Марина Соколова диэн куоракка олорор маастарга ободоктаах, брошкалаах, ытарҕалаах киэргэл наборун үбүлүөйбэр оҥотторон кэппитим, кэлин киниттэн өссө хас да оҥоһугу ылбытым. Олохтоох маастар Ньургуйаанаҕа эмиэ ыаҕайалаах дьэдьэн оҕуруонан оҥотторбутум. Чэ, ити курдук, бар дьонум өйөбүлүнэн үйэ чиэппэриттэн ордук мунньуум күннэтэ хаҥаан иһэр. Олоххо киһи, көннөрү үлэттэн-хамнастан, дьиэттэн-уоттун ураты сүрэх сөбүлүүрүнэн, дууһа туохха тардыһарынан дьарыктаах буолуохтаах дии саныыбын.

Ыал ийэтин, эбэтин быһыытынан дьоммор араас бүлүүдэлэри астыыбын. Кэлин интэриниэт киирэн  элбэххэ үөрэнэбин.

Дьэдьэн барыанньата

Дьэдьэни барыанньалыырбар тэҥ-тэҥҥэ саахарын кутабын. Киилэ дьэдьэҥҥэ киилэ саахары кутан, оргута түһэбин. Саахара уулунна даҕаны уоттан ылан кэбиһэбин.

Дьүөгэлэрбин ыҥыран чэйдэтэрбин астынабын. Дьэдьэн ойуулаах сылабаарым тула мустабыт, дьэдьэннээх чааскылартан итии үүттээх чэйбитин иһэ-иһэ истиҥник сэһэргэһэбит.