«ДАРХАН УУС» Саха сирин тимир уустарын XV быыстапкатын түмүгэ

Бу 15-с төгүлүн ыытыллар үбүлүөйдээх «ДАРХАН УУС» Саха сирин тимир уустарын сүрүн түһүлгэтэ чахчы сүрүн буоларын мэктиэлиир. Кыттааччы 2012 сыллаахха 30, 2015 сыллаахха 46, 2020 сыллаахха муҥутаан 77 киһи эбит. Быйылгы тэрээһин Усуйаана, Алдан, Ньурба, Бүлүү, Томпо, Таатта, Чурапчы, Амма, Уус-Алдан, Мэҥэ-Хаҥалас, Нам, Хаҥалас уонна Дьокуускай куорат маастардарын хапта.

Дьүүллүүр сүбэни аан дойдутааҕы таһымнаах быһах быыстапкаларын хас да төгүллээх кыайыылаахтара, СӨ Ил Дарханын «Үлэ киһитэ» бириэмийэтин лауреата Сарыал Билюкин салайда. Дьүүллүүр сүбэҕэ уустартан Саха Өрөспүүбүлүкэтин тимир уустарын сойууһун бэрэссэдээтэлэ Роман Готовцев-Мындыр Уус, Александр Данилов-Хаҥыл Уус уонна Василий Попов-Бааха Уус үлэлээтилэр. «Дэгиттэр быһах» хайысхаҕа тургутугу Леонид Говоров уонна Елисей Баишев ыыттылар.

«Бастыҥ ас быһаҕа» күрэскэ бастыҥнары саха төрүт аһын сөргүппүт И.И. Тарбахов үөрэнээччитэ, «Тыгын Дархан» ресторан шеф повара Константин Матаннанов уонна бу ресторан асчыттара Николай Атласов, Евгений Петров, Иван Решетников быһаардылар.

Быыстапка үөрүүлээх арыллыытыгар Дьокуускай куорат баһылыгын социальнай боппуруостарга солбуйааччы, «Таатта түмсүү» салайааччыта Владимир Аржаков, быйыл өрөспүүбүлүкэ уустарын ыһыаҕа ыытыллар Таатта улууһун Баайаҕа нэһилиэгиттэн баһылык Александр Романов уонна тимир ууһа, этнограф Николай Егоров-Байаҕыын кытыннылар. Тэрийэр бөлөх салайааччыта, предприниматель Никита Протодьяконов кыттааччыларга, спонсордарга уонна бары саха быһаҕын кэрэхсээччилэргэ махталын биллэрдэ.

Быйылгы үбүлүөйдээх «ДАРХАН УУС» Саха сирин тимир уустарын сүрүн түһүлгэтигэр Таатта Баайаҕатыттан «Мандар Уус» саха олоҕун кэлим музейыгар хараллан сытар саха быһаҕын аҕалан туруордулар, Мандар Уус олоҕун туһунан «Айанньыт» документальнай киинэ (режиссер Дмитрий Никонов) көһүннэ, ону тэҥэ быһаҕы кылаанныыр уонна лазерынан анабыл биитэр эҕэрдэ суруйар өҥө үлэлээтэ.

«ДАРХАН УУС» Саха сирин тимир уустарын сүрүн быыстапкатын 2010 сыллаахха эдэр сааһыгар суох буолбут Таатта Харбалааҕыттан төрүттээх меценат, предприниматель Серафим Валерьевич Попов тэрийбитэ. Тимир уустарын сүрүн түһүлгэлэрэ атаҕар туруутугар саха тимиргэ уһанар искусствотын сөргүппүт, саха ойуутун-мандарын үйэтиппит СӨ духуобунаска академиятын академига, П.А. Ойуунускай аатынан судаарыстыбаннай бириэмийэ лауреата Борис Неустроев-Мандар Уус уонна саха төрүт аһын тилиннэрбит Франция кулинарияҕа академиятын академига, Өксөкүлээх Өлөксөй аатынан судаарыстыбаннай бириэмийэ лауреата Иннокентий Тарбахов өҥөлөрө улахан.

«ДАРХАН УУС» Саха сирин тимир уустарын XV сүрүн түһүлгэтин түмүгэ:

«Уус-уран оҥоһуулаах быһах»

(12 кыттааччы)

1. Сандал Мордосов (Дьокуускай)

2. Николай Томскай (Усуйаана)

3. Айысхаан Данилов (Таатта)

«Бастыҥ ас быһаҕа»

(54 кыттааччы)

1. Айысхаан Данилов (Таатта)

2. Александр Борисов (Мэҥэ-Хаҥалас)

3. Федор Неустроев (Таатта)

«Дэгиттэр быһах»

(48 кыттааччы)

1. Гаврил Мохначевскай (Таатта)

2. Альберт Захаров (Томпо)

3. Александр Борисов (Мэҥэ-Хаҥалас)