Дьахтар күнүнэн оптуобустан сибэкки атыылааһын тохтоото

Докутааттар бастатан туран стационарнайа суох эргиэн эбийиэктэрин (НТО) тас көрүҥнэрэ куорат көстүүтүн буортулуурун бэлиэтээтилэр. Олохтоох дьаһалта урбааҥҥа, тырааныспарга департамена манан сибээстээн бу күннэргэ НТО-лары кэрийэн, тас көстүүлэрин тупсарарга үлэни ыытарга иһитиннэриини тарҕаталларын иһитиннэрдэ.

Улахан болҕомто Кулун тутар 8 күнүн көрсө оптуобустартан сибэкки атыытыгар уурулунна. Куорат баһылыгын солбуйааччы Владимир Дорожкин бу түгэн нэһилиэнньэттэн оптуобустар сырыылара мөлтүүрүнэн элбэх үҥсүү киирэр төрүөтэ буоларын бэлиэтээтэ:

«Маннык үҥсүү сибэкки атыылыыр маҕаһыыннаах урбаанньыттартан эмиэ киирэр. Онон эһиилгиттэн оптуобустан сибэкки атыылааһыны тохтотобут»,

– диэтэ Владимир Дорожкин.

Бу оннугар сибэкки атыытын муниципальнай эбийиэктэргэ, спорт оскуолаларыгар, сылаас тохтобулларга атыылыыр боппуруоһу көрөбүт. Маны сэргэ бырааһынньык күннэригэр быраабы араҥаччылыыр уорганнар көҥүлэ суох атыыны бэрэбиэркэлээһини күүһүрдэллэрэ күүтүллэр.

Оттон дьаарбҥкалары уонна маассабай тэрээһиннэр чэрчилэринэн атыыны-тутууну дьокутааттар оннунан хаалларарга этии киллэрдилэр.

Бэлиэтээн эттэххэ, бүгүҥҥү күҥҥэ куорат бүддьүөтүгэр стационарнайа суох эбийиэктэртэн 4 мөл. солк курдук киирэр.

Быстах атыы-тутуу чааһыгар бэрээдэги олохтооһун куорат тас көстүүтүн буортулааһыны тохтотор сыаллаах, диэн Куорат дууматын пресс-сулууспата иһитиннэрэр.