Дьахталлар, сэрэниҥ, чугаһаата!

Кинилэри кытта кэпсэтэ, ааттаһа барбаппын: «Сатаан үүммэт буоллаххытына, туура тардан быраҕаттаан кэбиһиэм!» – диэн өс саҕа буолабын. Ону ол диэбэккэ син үүнээхтииллэр, куоҕайан-иэҕэйэн син күһүн ас биэрэн абырыыллар. Сорохтор күммүт оҕуруоппутуттан саҕаланар, дэлби кэпсэтэбит, ааттаһабыт, манньыйабыт дэһэллэр. Ыалдьыттыы кэллэхтэринэ дьиэҕэ киириэх иннинэ бастаан хайаан да оҕуруот көрө бараллар, сүбэ-ама биэрэллэр.

Былырыын ыам ыйын бүтэһигэр тиийэн кийииппин баттаһа барытын эрдэ олотторон кэбиспитим. Дьэ, онтон саҕаланна эбээт. Сотору-сотору тоҥоруунан куттааһын, түүнүн тымныы, араассадаларгытын киллэриҥ, барытын сабыталааҥ, күнүс буолла да таһаарыҥ диэн норуот синоптига сэрэт да сэрэт, куттаа да куттаа. Ол аайы, «итинник диэтэ», «маннык диэтэ» диэн хаһаайкалар барахсаттар барытын «тук» курдук толорон, итэҕэйэн иһэллэр. Онуоха биэдэрэ, баалынай, хара, маҥан бүрүөһүн барыта үлэни көрүстэ. Мин буоллаҕына ылы-чып олоробун, барытын олорпутум, тугунан да саппаппын диэн тыл да быктарбаппын. Саатар бэс ыйа бэйэтэ да тымныы, тоҥоруулаах буолбута. Дэлэҕэ, отон, сир аһа сибэккитэ эрдэ тоҥон, күһүн элбэх улууска үүммэтэҕэ.

Дэриэбинэ киэһээҥҥи кэпсэтиитэ барыта халлаан туругун туһунан. «Арҕааттан тыалырбыт, тоҥоруу кэлээри гыммыт»,  «үүнээйилэрбит саһараары гыммыттар», «бу түүнү аһардахпытына, таһаартыыр инибит», «кыргыттаар, барытын сабыталыыр үһүбүт, таһырдьа тураллары киллэртиибит» эҥин диэн сүпсүгүрүү, куттаныы, халлааны кэтээһин-манааһын. Сөп буоллаҕа, ким бүөбэйдээн олорпут, кыһыннары аһатыахтаах хаарыан аһыттан матыан баҕарыай.

Өссө күлүүлээҕэ диэн, социальнай ситим хонуутугар маннык иһитиннэриилэр кэлбиттэрэ, ону хайдах баарынан уларыппакка таһаарабын: «Миэнэ айкабын, маанылаан кабачоктары били маҥан һэбинэн һаппытым, тарайан баран һыталлар», «соседтар хортуоскалара барбыт», «миэннэрэ кыралар дии-дии ытаабытым, хата, быкпатахтара да бэрт эбит»,  «маҥан һэппит туһалаабат эбит дии», «кириэһилэ һабыыта диэн, дьыбаан эргэ һабыыта, штора, ол-бу эргэ бырастыына, адьас ыһыах түһүлгэтин курдук буолбуппут һосеттар бары», «бүгүн адьас түптэ уматан, алҕаан, дүлүҥнээн, хомустаан һаайарым дуу дии һылдьабын». Маннык курдук иһитиннэриилэр кэлитэлээн барыбытын сэргэхсиппиттэрэ.

Быйыл бэс ыйа олох ураты итии буолар диэн онон-манан саппат, түбүгүрбэт инибит диэн эрэнэбин, ол да буоллар норуоппут синоптигын кэтэһэрбит-манаһарбыт буолуо.