Дьаарыннар олохтоохтор көҕүлээһиннэрин өйүүр бырагыраамаҕа өссө төгүл кыттан эрэллэр!

Дэлэҕэ даҕаны сайдыы-үүнүү диэн буолла даҕаны, киһи да буоллун, тэрилтэ да буоллун, бүтүн дойду да олоҕун суолга холуохтара дуо – олоҕун суола, олоҕун суолун аартыктара уо.д.а. Бүгүҥҥү бэлиэтээһиним 2014 сыллаахха тэриллибит Хатас нэһилиэгин «Дьаарын» түөлбэтин суолун туһунан буолуо. Бары билэрбит курдук Хатас Дьокуускай куорат таһынааҕы биир саамай тэрээһиннээх, тэриллиилээх нэһилиэк. Манна нэһилиэнньэни кытта үлэ араас көрүҥэ ыытыллар – түөлбэлэринэн, субуотунньуктар, араас күрэхтэр, көрүүлэр.

2014 сылтан саҥа «Дьаарын» түөлбэ тэриллибитэ. Саҥа буоларын быһыытынан суола-ииһэ, гааһынан, уотунан хааччыллыыта болҕомтону эрэйэр өрүттэрэ элбэх этэ. Суол – сүрүн боппуруос.  Манна «скорай», уу, мас, чох аҕалар массыыналар кыһалҕаны көрсөллөр. Тибии типтэҕинэ, олохтоохтор сатыы сылдьаллар. Уулуссалара уота суох.

Дьэ бу боппуруостарга эппиэттэһэргэ барыта тэҥҥэ баар буолан хаалбатын өйдөөн туран, дьаарыннар СӨ үрдүкү салалтата олохтоохтор көҕүлээһиннэрин өйүүр бырагырааматыгар (ППМИ) киирсэн, 2022, 2024 сылларга кыттан кыайан, 3 км суол оҥоһуллубута. Бырагыраамаҕа кыттыыга, аата да этэрин курдук, нэһилиэнньэ көҕүлээһинэ сүрдээх улахан. Бу чааһыгар дьаарыннар биир улахан ыал оҕолорун курдук олус көхтөөхтөр уонна түмсүүлээхтэр. Инньэ гынан үп-харчы көрүллэн үлэ барарын тухары бэйэлэрин өттүттэн ылыммыт эбэһээтэлистибэлэрин олох чуолкайдык толороллор, ол бырагыраама үлэтигэр төһүү күүс буолара мөккүөрү үөскэппэт.

Бу сырыыга дьаарыннар аны атын уулуссаларын оҥотторорго кыттан эрэллэр. Бу сайын эмиэ биирдии ыал 7000 солкуобайдыыны кыттыһан, суол оҥоро сылдьар дьонтон кумах атыылаһан, Урожайнай, Овощеводтар уулуссаларын оҥотторбуттара. Түөлбэ дьоно биир киһи курдук үбүнэн кыттыһаллара, субуотунньукка оҕолуун, кырдьаҕастыын тахсан үлэлииллэрэр, биллэн турар, биир тыынынан буолбат. Түмсүүлээх буолууга сүүрэр-көтөр, тэрийэр дьон баар: Жуллярова Светлана Иннокентьевна уонна Винокурова Сусанна Николаевна. Кинилэр баар буоланнар докумуон, кэлии-барыы, тиэрдии, иһитиннэрии барыта былаан быһыытынан баран иһэр.