Даачалаахтар сэрэниҥ: улахан ыстараапка эбэтэр холуобунай буруйга тардыллыаххытын сөп

“Арассыыйа Административнай быраабы кэһии туһунан кодексын 20.4 ыстатыйатынан, баһаартан куттал суох буолуутун быраабылатын кэһии иһин сэрэтии эбэтэр 5000-тан 15000 солкуобайга диэри ыстараап күүтэр. Баһаар утары ураты эрэһиим кэмигэр ыстараап кээмэйэ 10000-тан 20000 солкуобайга диэри үрдүүр”, - диэтэ Русяев.

Быраабы кэһии түмүгүнэн баһаар, атын киһи баайа-дуола эчэйдэҕинэ, доруобуйаҕа кыра эбэтэр орто эчэйиигэ тириэрдэр түгэнигэр, ыстараап кээмэйэ улаатар. Маннык түгэҥҥэ буруйдаах 40-50 тыһыынча солкуобайга диэри төлүөхтээх.

Өскөтүн баһаар ойуурга тарҕаннаҕына, КоАП 8.32 ыстатыйата (“Ойуурга баһаар куттала суох буолуутун быраабылатын кэһии”) күүһүгэр киирэр. Бу сокуонунан биирдиилээн дьоҥҥо ыстараап 15000 солкуобайтан саҕаланар уонна балаһыанньаттан итиэннэ баһаартан куттал суох буолуутун анал эрэһиимиттэн көрөн 60000 солкуобайга тиийиэн сөп.

Ыстараап төлөммүт да буоллаҕына, буруйдаах эмсэҕэлээбит дьоҥҥо толуйар эбээһинэстээх. Арассыыйа Гражданскай кодексын 1064 ыстатыйатынан даачаҕа олорор киһи умайбыт күрүө, дьиэ, баанньык, массыына, теплица сыанатын толору толуйуохтаах.

Маны таһынан холуобунай дьыала тэриллиэн эмиэ сөп. Сэрэҕэ суох буолууттан сылтаан баай-дуол алдьаммыт, улахан эчэйии оҥоһуллубут, киһи өлбүт, эбэтэр ойуурга улахан хоромньу оҥоһуллубут түгэнигэр тахсар.

Юрист бэлиэтээбитинэн, бөҕү-сыыһы даачаҕа уматыы бобуллубат, ону Арассыыйа бырабыыталыстыбатын 1479 №-дээх уурааҕынан олохтоммут кытаанах быраабылалары тутуһан эрэ оҥоруохха сөп. Даача уонна сад учаастактарыгар ирдэбиллэр баһаартан куттал суох буолуутун быраабылатыгар 4 №-дээх сыһыарыыга ыйыллыбыттар уонна 2026 сыл ахсынньы 31 күнүгэр диэри дьайаллар.