Дьааҥыларга өрөспүүбүлүкэ бүттүүнэ көмөлөһөр

Дьааҥы улууһугар көмөҕө үгүс үтүө санаалаах дьон туруммутун туһунан Арктика уокуругуттан талыллыбыт Ил Түмэн дьокутаата Сергей Сивцев кэпсээтэ: 

– Бу күннэргэ уопсайа 14 туонна гуманитарнай көмө Дьааҥыга тиийдэ. Ону таһынан улуус иһигэр 6 туонна кэриҥэ көмө хомуллан, эмсэҕэлээбит нэһилиэктэргэ бөртөлүөтүнэн тиэрдиллэр. Түмсүүлээх буолуу, бэйэ-бэйэҕэ көмөлөсүһэр үтүө өрүт маннык түгэннэргэ ордук чаҕылхайдык көстөр эбит. Көмө баһыйар өттүн боростуой дьон хомуйаллар, гуманитарнай көмөнү тутар пууҥҥа аҕала тураллар этэ.

Сарсын, күммүт-дьылбыт табылыннаҕына, Дьокуускайтан сөмөлүөтүнэн өссө биир гуманитарнай көмө барыаҕа. Бу – өрөспүүбүлүкэ резервэтиттэн “ОДьКХ” ГУТ ититэр систиэмэтин чөлүгэр түһэриигэ туттуллар матырыйааллар, уопсайа 5,5 туонна таһаҕас. Тиийбит таһаҕас салгыы нэһилиэктэргэ ЫБММ бөртөлүөттэринэн тиксэриллэр.

Бу нэдиэлэҕэ Дьааҥы улууһун баһылыга Владислав Иванов киин куоракка кэлэн үлэлии сылдьар. Үлэбитин салгыы хайдах ыытарбытын көрсөн сүбэлэстибит.

Чурапчы, Горнай улуустара бастакынан кэлэн көмө туттарбыттара. Ол сорҕото сарсын дьоммутугар көтөн тиийиэхтээх. Маны таһынан араас тэрилтэлэр, биирдиилээн урбаанньыттар иэдээҥҥэ түбэспит биир дойдулаахтарбытын өйөөтүлэр.

Бөдөҥ тэрилтэлэртэн биир бастакынан В.В. Омуков салайааччылаах “Якутлесресурс” үлэһиттэрин биир күннээҕи хамнастарын хомуйан улуус салалтатыгар сертификат туттарда. Ону таһынан, тэрилтэ В.В.Прудецкай салайааччылаах Дьокуускайдааҕы салаата таһаҕас тиэйэр массыынанан хааччыйан көмөнү аэропортка тиэрдиигэ төһүү буолла.

Маны таһынан “ОДьКХ” ГУТ гуманитарнай көмө хомуйан ыыппыттара. Генеральнай дириэктэр В.С. Чикачев быһаччы өйөбүлүнэн быйыл оттук сезона эрдэ тэриллиэхтээх. Уу ылбыт уонна оттор маһа суох хаалбыт дьиэлэри киин ситимҥэ холбооһун туһунан боппуруостары быһаарсабыт.

Мэр Дмитрий Садовников көҕүлээһининэн Дьокуускай куорат Олохтоох дьаһалтата биир күннээҕи хамнастарыттан үбүнэн көмө хомуйан эрэллэр. Хас биирдии уокурукка гуманитарнай көмөнү хомуйуу тэриллибитэ. Маны таһынан, дьаһалтаны кытта сөбүлэҥ түһэрсии түмүгэр Дьааҥыга үлэлии сылдьар устудьуоннар этэрээттэригэр аһылыктара хааччыллыахтаах.  Бу сөбүлэңңэ олоҕуран инникитин улуус уонна киин куорат олох бары эйгэтигэр бииргэ үлэлэһиэхтэрэ.

Аадырыстаах көмөнү уонна да атын малы-салы  тутууну тохтоттубут. Тоҕо диэтэххэ барытын сөмөлүөтүнэн ыытар уустуктардаах, ороскуоттаах. Өссө да биир сөмөлүөт таһаҕас барбакка сытар. Билигин үбүнэн-харчынан көмөнү хомуйабыт – тутуу матырыйаалын атыылаһан ыытарбытыгар наада. Хоту дойду кыһына эрдэлиир. Дьон кыстыкка бэлэмнэниэн, дьиэлэрин сөргүтүөхтэрин, чөлүгэр түһэриниэхтэрин наада.

Дьааҥы улууһун олохтоохторун ааттарыттан бүттүүн өрөспүүбүлүкэ дьонугар барҕа махталбын биллэрэбин!