Дьөһөгөй сыла үтүө сонуннаах саҕаланна

Бүгүн «Киин куорат» эрэдээксийэтигэр үүммүт сыл ураты сылаас, сырдык сурук киирдэ.

«Кэлэр сылга ас-таҥас сыаната икки бүк үрдүүр диэн ыгылытаннар, сыл бүтэһик күнүгэр оптовай маҕаһыыҥҥа тиийдим. Киһи толору. 10-ча «Санни-Голд», мокоруон арааһын ылан, биэнсийэҕэ олорор киһи сыана ыарааһыныттан куоппут тэҥэ сананан, үс суумканы соһон нырылытан киллэрэн оннуларын буллартаатым. Арай эрэммит ахан тэрэппиискэ суумкам түгэҕэр кумааһынньыгым суох! Ыксал, ыгылыйыы буолла. Сиэн уолбунаан иһирдьэнэн-таһырдьанан көрдөөтүбүт - суох. 

Кумааһынньыкпар уу харчынан 8.500, картабар 2 ыйдаах биэнсийэм, атын картаҕа сиэммэр диэн кыра уурунуулаах картам, ону кытта подпискаҕа сурутуу квитанциялара бааллара. Унньу-санньы түһэн олордохпутуна арай төлөпүөнүм тырылаата. Эдэр киһи куолаһа ааппынан ыҥырда. «Лонгинов уулуссаттан кумааһынньык буллум. Таксиспын. Төлөпүөнүҥ нүөмэрин кумааһынньыкка баар квитанцияттан ыллым. Аадырыскын эт, билигин илдьэн биэриэм»,— диэтэ. Соһуйан, үөрэн тура эккирээтибит.

Таксист уолбут тиийэн кэлбитигэр махтанныбыт. Күүспүнэн 1 тыһ. туттардым. Ыган туран аатын, хайа дойдуттан сылдьарын ыйыттым. Альберт Неустроев диэн Мэҥэ Хаҥалас Төхтүр нэһилиэгиттэн сылдьар ыччат эбит. Саха дьоно маннык чиэһинэй ыччаттардаахпытыттан олус үөрдүм, киэн тутуннум. Альберт дьиэ кэргэнигэр, төрөппүттэригэр бу үүнэр дьыл үгүс  үөрүүнү, табыллыыны аҕаллын!»