Чинчийии түмүгэ соһутта

Г.В. Плеханов аатынан Арассыыйатааҕы экономика университетын учуонайдара лабораторнай чинчийиилэри ыыппыттар. Ол түмүгэ соһуччу буолан биэрдэ: итии уонна аһыы амтаннаах утахтары – морсу, лимоннаах чэйи, фруктаттан соктары, гаастаах утаҕы пластиковай ыстакааҥҥа куттар ордук.

Исписэлиистэр үс көрүҥ анаалыһы ылбыттар. Онуоха полипропиленовай уонна ламинированнай хордуоҥка ыстакааннарга ити үөһэ этиллибит утахтары кутан көрбүттэр. Тургутуулар 95 °C диэри температураҕа ыытыллыбыттар.

Чинчийии түмүктэрэ:

Полипропиленовай ыстакааннар бөҕөлөрө, итиини тулуйаллара, быһыыларын сүтэрбэттэрэ бэлиэтэммит. Олорго кутуллубут итии уонна аһыы суурадаһыҥҥа (3%-наах уксус кислотата булкаастаах) туох даҕаны туора, буортулаах бэссэстибэ булуллубатах.  Полипропилен (маркировката «РР 5») – биирдэ туттуллар иһити оҥорон таһаарыыга киэҥник туттуллар матырыйаал.

Хордуоҥка ыстакааннар, төһө даҕаны «экологичнай» аатырбыттарын иһин, төттөрүтүн, соччото суох түмүгү көрдөрбүттэр. Ламинированнай бүрүөһүннэрэ уонна килиэйдээх сииктэрэ үрдүк температураҕа киһиэхэ куһаҕаннык дьайар бэссэстибэлэри таһаараллара биллибит. Ону сэргэ, бу матырыйаалтан оҥоһуллубут ыстакааннар быһыыларын сүтэрэллэр, кэбирэхтэр диэн буолбут.

Г.В. Плеханов аатынан Арассыыйатааҕы экономика университетын биир тутаах кафедратын сэбиэдиссэйэ Ксения Сухарева: «Биирдэ туттуллар ыстакааҥҥа олус итии эбэтэр аһыы амтаннаах утаҕы, холобур, морсу эбэтэр лимоннаах чэйи куттар буоллаххытына, полипропилены таларгыт ордук, куттала суох. Оннукка хордуоҥка ыстакаан эрэбилэ суох», – диэн сүбэлээбит.