Чичико сахалыы эрэ саҥаны истэр

– Бастакыттан сахалыы кэпсэтэ үөрэтэн эбитэ дуу, сахалыы эрэ истэр. Нууччалыы саҥардахха, син өйдүүрэ буолуо эрээри, өйдөөбөтөҕө буолааччы. Онтута наһаа көрүдьүөс.

Наар итинник дворняжкалары ылааччыбыт. Олус өйдөөх, чэнчис уонна доруобай боруода. Уонна уһун үйэлээхтэр, тугу барытын аһыыллар, таһырдьа эрэ туалеттыыллар. Хойутаттахха, дьэ, аҕыс айдааны тардар дьон.
Бастакы ыппыт Джулия 20 сааһыгар барбыта. Эмтэтэн көрбүппүт даҕаны, «ресурсата бүппүт» диэн буолбута. Биирдэ эрэ төрөөбүт. Ону Мыс диэн ааттаабыппыт. Ол уолбут 19 сааһыгар дьиэттэн баран хаалбытын көрдөөн бөҕө буолбуппут. Өйдөөх ыт өлөрүгэр бэйэтэ баран хаалар дииллэр.

Чичикону 2000 сыллаахха ахсынньыга ылбыппыт. Аатын аҕабыт Михаил биэрбитэ. Онон бу төрдүс ыппыт. Хара ааныттан таһырдьа сылдьарга үөрэппиппит. Кыратыгар биирдэ-иккитэ саахтаан-ииктээн мөҕүллүөҕүттэн, наар таһырдьа сылдьар. Хайҕаналларын олус сөбүлүүллэр. Киһиргэстэрэ диэн сүрдээх.

Ыйга биирдэ грумерга (ыт парикмахера) сылдьабыт. Таһырдьа таҕыстаҕына оҕолоро имэрийэллэриттэн астынар аҕай. Аҕабыт орто дойдуттан суох буолбутугар олох сытыар диэри  мунчаараахтаабыта. Ыт киһи доҕоро дииллэрэ чахчы ээ, букатын.

Ол эрээри Чичико бүгүн санаата холлон олорор.
– Дьиэбиттэн суумката суох таҕыстахпына, сайыһа хаалар. Суумкалаах таҕыстым да, үлэтигэр барар диэн наадыйбат. Оттон суумката суох таҕыстахпына, бэйэтэ эрэ барда диэн хомойор, сыллаппат даҕаны. Бу билигин  кэлэрбэр оннооҕор сыллаппата даҕаны ээ. Аны, илдьэ бардахха, тэһийбэккэ ытаан батааччыта суох.

Оттон үлэбиттэн кэллэхпинэ дьиэҕэ үөрэ-көтө көрсөрө үчүгэйэ сүрдээх.