Чэпчэки сыанаҕа бэриллэр куортам дьиэтэ эбиллиэ

Бу  бырагыраама, дойду бэрэсидьиэнэ 2022 сыллааҕы Илиҥҥи экэнэмиичэскэй пуорумҥа эппит соругар олоҕуран, 2024 сылтан үлэлиир. Марха түөлбэтигэр 24 кыбартыыралаах бырайыак олоххо киирбитэ. Салгыы Дьокуускайга уонна Алдаҥҥа чэпчэтиилээх куортамҥа биэрэргэ анаан үс дьиэ үлэҕэ киирбитэ. Олорго уопсайа 193 кыбартыыра баара этиллибитэ. 2025 сылга 169 субаренда дуогабара түһэрсиллибитэ. Ол иһигэр: Дьокуускайга – 141 кыбартыыраҕа, Алдаҥҥа –28 кыбартыыраҕа дьон көһөн киирбит.

Оттон быйыл бу этиллэр бырагыраама түөрт куораты хабыаҕа. Дьокуускайы, Алданы таһынан Нерюнгри уонна Мииринэй эбиллиэхтэрэ. Ол иһигэр Дьокуускайга – 283, Алдаҥҥа – 117, Нерюнгрига – 252, Мииринэйгэ – 158 кыбартыыра бу сыалга ананыаҕа. Санатан эттэххэ, Саха сиригэр маннык чэпчэтиилээх куортамҥа анаан, 2026 сылга диэри уопсайа 1003 кыбартыыра лимиитэ бэриллибит этэ.

Туһааннаах бырагыраама үтүө өрүтэ – итиннэ анаан тутуллубут дьиэлэргэ кыбартыыраны уларсан олоруу куоракка куортам олоҕурбут сыанатыттан лаппа чэпчэки буолар. Тоҕо диэтэххэ, төлөбүрүн үс гыммыт биир өлүүскэтин федеральнай уонна эрэгийиэн бүддьүөтэ субсидия быһыытынан төлөһөллөр. Ол түмүгэр, дьиэ уларсааччы, холобур, 2 хостоох толору хааччыллыылаах кыбартыыраҕа олорор ыйдааҕы  төлөбүрэ 12 тыһ. солк. кэриҥэ буолар диэбиттэрэ. Биллэн турар, ону таһынан куортамнаһар киһи хомунаалынай өҥө иһин төлөбүрүн бэйэтэ толору уйунар. Ол да үрдүнэн улахан өйөбүл эбээт!

Дьокуускайга “Уһук Илиҥҥэ чэпчэки сыанаҕа куортамҥа бэриллэр дьиэ”  бырагырааманан Билибин уулуссатын 17 нүөмэригэр 14 этээстээх, 141 кыбартыыралаах дьиэ үлэҕэ киирбитэ. Сорохтор BILIBINO  олорор дьиэ комплексын быһыытынан билэллэр. Бу дьиэҕэ 76 – биир хостоох, 52 – 2 хостоох, 13 үс хостоох кыбартыыра баара этиллибитэ. Силигин ситэрэн, куортамҥа бэриллэр дьиэлэр сантехниканан эрэ буолбакка, сүрүн миэбэлинэн, бытовой тиэхиньикэнэн хааччыллаллар! Дьиэ аттыгар хайаан да оҕо оонньуур былаһааккалаах буолар. Төһө иэннээх кыбартыыраны уларсаргыттан тутулуктанан, ыйдааҕы төлөбүр 5 тыһ. солк. 14 тыһ. солк. диэри халбаҥныыра этиллибитэ.

“Юлаҕа”, “Доска якт ру” көрдөххө, толору хааччыллыылаах 2 хостоох кыбартыыра куортамнаһан  олоруу ыйдааҕы төлөбүрэ хас сыллаах тутуу, хайдах өрөмүөннээх, төһө миэбэллээх уонна куорат ханнык оройуонугар турарыттан тутулуктанан, араастаһар. Ол эрээри бырагыраама дьиэтин курдук саҥа, сөбүгэр миэбэллээх 2 хостоох кыбартыыраны күн бүгүн чэпчээбитэ 40-45 тыһ. солк. булуохха сөп. Холобур, ити BILIBINO дьиэттэн чугас, Билибин уул. 20/1 дьиэтигэр ким да олоро илик саҥа 2 хостоох кыбартыыраны 50 тыһ. солк. уларсалларын туһунан биллэрии сылдьар. Ону таһынан куортамнаһааччы ууну, уоту туһанарын иһин, счетчик көрдөрүүтүгэр олоҕуран, эмиэ төлөһөр эбит.

Киин бэчээт суруйарынан, бу «Дом.рф» олоххо киллэрэр Уһук Илиҥҥэ туһуламмыт бырагыраамата 2043 сылга диэри үлэлиэхтээх. https://xn--d1aqf.xn--p1ai/about/rent-dfo/ сигэнэн киирэн, кимнээх бу чэпчэтиилээх куортам бырагырааматыгар хапсыахтарын сөбүн билсиэххэ сөп. Оттон чопчу Саха сирин киэнин centrsakha.ru саайка булуоххут. Онно атын олорор дьиэ бырагыраамаларын туһунан эмиэ билиэххит.

Саха сиригэр бу бырагыраамаҕа үлэлэһэр эпэрээтэринэн «Саха Өрөспүүбүлүкэтин олорор дьиэ бырагыраамаларын сайыннарар киинэ» АНО анаммыта. Киин Дьокуускайга Орджоникидзе уул., 38 нүөмэригэр түстэнэн үлэлиир. Куортам пуондатын кытта үлэлэһэр отделлаах. +7(4112)-50-76-78 эрийэн ыйыталаһыахха  сөп.