Чэпчэки куортамнаах дьиэ олохтоохторо күлүүстэрин туттулар

Билибин уул., 17 тутуллубут 14 мэндиэмэннээх дьиэ 76 биир хостоох кыбартыыралаах, 52 – икки хостоох, 13 – үс хостоох. Онон 141 ыал кыстыкка, Саҥа дьылы көрсө сабыс-саҥа, ыраас, сылаас буоларын ааһан, чэпчэки сыанаҕа куортамнаах дьиэҕэ киирии үөрүүтүн биллэ. Федеральнай уонна өрөспүүбүлүкэ бүддьүөттэриттэн көрүллэр субсидия суотугар, холобура, 2 хостоох кыбартыыра куортама 2024 сылтан ыйга 12 тыһ. солк. үрдээбэккэ турар.

Дойду баһылыга Владимир Путин 2022 сыллааҕы Илиҥҥи экономическай форум кэнниттэн көҕүлээбит «Уһук Илиҥҥэ чэпчэки сыанаҕа куортамнанар дьиэ» бырагырааманан Саха сиригэр 2024-2026 сс. 1003 кыбартыыра тутуллуохтааҕа: 448 – Дьокуускайга, 252 – Нерюнгрига, 158 – Мииринэйгэ уонна 145 – Алдаҥҥа.

Дьокуускайга бастакы маннык 24 кыбартыыра 2024 сыл кулун тутар ыйыгар үлэҕэ киирбитэ. 2025 сылга 141 кыбартыыра тутулунна. Кэлэр 2026 сылга 283 кыбартыыраны үлэҕэ киллэрэр былааннанар. Бэлиэтээн эттэххэ, куортамҥа бэриллэр кыбартыыралар миэбэлинэн, бытовой тиэхиньикэнэн толору хааччыллыылаахтар.

Санатар буоллахха, «Уһук Илиҥҥэ чэпчэки сыанаҕа куортамнанар дьиэ» бырагыраама сүрүн сыала – эдэр исписэлиистэри, устудьуоннары уонна сэдэх идэлээх, ордук наадалаах каадырдары чэпчэтиилээх усулуобуйаҕа олорор дьиэнэн хааччыйыы.