Чэгиэн уһун үйэлэнии медицинатын киинэ үлэлиир

Бу хайысха “Көхтөөх уһун үйэлэнии” национальнай бырагыраама чэрчитинэн үлэлиир.

Сүрүн сыал-сорук – организмҥа барар уларыйыылары эрдэттэн булуу уонна ыарыыны сибикитэ биллэ, олохсуйа илигинэ бохсуу. Чинчийии икки түһүмэҕинэн барар: бастаан специалистар кэлбит киһини анкеталыыллар, олоҕун укулаатын үөрэтэллэр, этин-сиинин, састаабын, биологическай сааһын уонна тымырдарын туругун быһаараллар. Салгыы эбии бэрэбиэркэ наада буоллаҕына дириҥэтэн чинчийиигэ ыыталлар.

Бэс ыйыттан саҕалаан 300-тэн тахса киһи чинчийиини ааспыт. Быраастар академик Б.В. Петровскай аатынан РНЦХ анал үөрэҕи ааспыттар, онон уһун үйэлэнии быраастарын быһыытынан үлэлии олороллор.  

Чинчийиини ааспыт киһиэхэ Доруобуйа пааспара туттарыллар. Онно ханнык ыарыы баар буолуон сөбө, сэрэтии суруллар. Ону тэҥэ хайдах сөпкө аһыыра, хамсанара-имсэнэрэ, олоҕун сааһыланара сүбэ быһыытынан киирэр.

Билигин бу киин тэрилтэлэри кытта корпоративнай бырагыраамалары оҥорорго, үлэһиттэр доруобуйаларын кэтээһиҥҥэ үлэлэһэргэ бэлэм. Биирдиилээн дьон эмиэ чинчийиини ааһыахтарын сөп. Эрдэттэн суруттарыы ирдэнэр.

ЧЭгиэн уһун үйэлэнии киинигэр 18 саастарыттан үөһээ дьон тиийиэхтэрин сөп.

Уһун үйэлэнии акылаата эдэр саастан ууруллар.