Чараас хармааннаах санаммат даҕаны...

Сорудаҕа маннык: үлэбит аадырыһыттан М. Николаев аатынан Медицина киинигэр илдьэр такси көрдүөхтээхпит. Сарсыарда үлэҕэ, үөрэххэ айан, сырыы үгэннээн турар кэмигэр. Сыананы киһи бэйэтэ быһар сыһыарыытыгар 300 солк. диэхтээхпит, атыттар төһөҕө илдьэргэ бэлэмнэрин билиэхтээхпит. Биэс мүнүүтэ күүтүөхтээхпит. Чэ, “айаннаатыбыт”. 

Бастакы сыһыарыы – Drivee. Эрэдээксийэ аадырыһын – Хабаров уул., 27/1 харса суох суруйдубут уонна сыанабытын 300 солк. диэтибит. Чугас массыына элбэх, ол эрээри ким да сэҥээрбэтэ, көрөллөр эрэ. Араас сирэй-харах бары элэҥнээн ааста. Бука, “хайдах буолбут киһиний”, “үчүгэйэ бэрт” диэтэхтэрэ.  Уу чуумпу. Санаабытын түһэрбэппит, күүтэбит. Сыананы үрдэтэрбитин кэтэһэн көрдүлэр быһыылаах. Суох, ылбатылар. Массыына элэҥнэс, сөбүлэһээччи – мэлигир.

Яндекс Go. Сыһыарыы бэйэтэ 495 солк. таһаарда. Иллэҥ массыына суох диэн, хата, маладьыаһыҥ тута сэрэттэ. Хас даҕаны суоппарга сыҥалаан көрдө. 5 мүнүүтэ тухары биир да массыына көстөөхтөөбөтө. Ыксыыр киһи ырааппат эбит диэн баран сабан кэбистибит.

Maxim. Мобильнай сыһыарыыга 460 солк. диэн таһаарда. “Ускорить” диэни баттыахха сөп эбит, бука, эбии харчыга. Дьээбэҕэ төһө мүнүүтэнэн массыына биэрэллэрин күүтэ сатаатыбыт, илдьиэххэ баҕалаах эмиэ көстүбэтэ. Арба, “сиэппитигэр” 300 солк. этибит дии санаан, сабан кэбистибит. 

Поехали! 440 солк. көрдөөтө. Биһиэхэ сөбө суох сыана.

Uber Russia. Иллэҥ массыына суох аатырда. Аны сыанатын ончу да таһаарбата (тугу эрэ сатаабатыбыт дуу эбэтэр ырааҕа бэрт диэтэ дуу).

Такси сулууспата. 2 ГИС сыһыарыыттан урукку курдук төлөпүөнүнэн эрийэн сакаастыыр сулууспаны буллубут. Түөрт нүөмэрдээх. Бастакытыгар “Номер временно не может быть вызван” диэтэ. Иккис, үһүс нүөмэрдэрэ арахса сылдьаллар. Төрдүспүтүгэр эрийэн тиийдибит. Диспетчер: “Билигин массыына суох, бары сүүрэ сылдьаллар. Биһиги тэрилтэлэри кытта үлэлиибит”, – диэн хоруйдаата. Сыана төһө буоларын ыйыппыппар, 600 солк. диэтэ. Махтанан баран ууран кэбистибит.

Биир чаас элбэҕи быһаарар эбит...

Манна сөп буолбакка, тохтуу түһэн баран, аны биир чааһынан өссө сакаастаан көрөргө сананныбыт. Дьэ, хайыыллар эбит?

Бастакы сыһыарыыга суруйдубут. Дьэ, доҕор, “оргуйа” түспэтилэр дуо. Сыанабыт 400-500 солк. тиийэ халбаҥнаата. Сөбүлэспэтибит. Сэмээр кэтээн көрдүбүт. Онтон көрүөх бэтэрээ өттүгэр куоталаһа-куоталаһа түһэрэн бардылар. Бука, таах туруохтааҕар, кыра да харчыга баран кэлэргэ сөбүлэһэр санаалаахтар. Өр-өтөр буолбата, биир омуктуу ааттаах суоппар 300 солк. илдьэргэ бэлэммин диэн соһутта! Дьэ, доҕор, ону биһиги кыһыылаах баҕайытык “Отклонить” диэбэтибит дуо!

Салгыы иккис сыһыарыыга сакаастаатыбыт. Балачча өр күүттэрэн баран 11 мүнүүтэнэн үрүҥ өҥнөөх массыына кэлиэх буолла, биһиги биэс эрэ мүнүүтэ күүтүөхтээхпит. Аны 410 солк. диэн таҕыста. “Отменить” диэни көрдөөн, ууга-уокка түстүбүт. Булбакка, балачча булумахтанныбыт. Ыксаан, суоппарга эрийдибит. “11 мүнүүтэ күүтэр кыаҕым суох. Атын массыына көһүннэ”, – диэн сылтаҕырдыбыт. Хата, кыыһырбата. “Отмена” диэни булан баттаа, миэхэ суох”, – диэн сүбэлээтэ. Син өр хаһан, аллараттан булан ыллыбыт. Һуу, оонньуу олорон хара испииһэккэ киирбэтэх киһи!

Түмүк

Сэрэйбит сэрэх, 300 солк. эрэдээксийэттэн Медкииҥҥэ илдьэргэ бэлэм суоппар көстүбэтэ. Сарсыарда үлэҕэ, үөрэххэ барар кэмҥэ сыана лаппа үрдүүр, массыына кэмчи уонна былдьаһык буоларын өссө биирдэ итэҕэйдибит. Ыксаабыт эбэтэр хармаана чараас киһи эрдэ тахсан, уопсастыбаннай тырааныспарынан сир ыла турбута көнө эбит диэн түмүккэ кэллибит.