Чамча айылҕата – аккырыыккаҕа

Бу кэрэ айылҕалаах сири тоҕус томтордоох Чурапчы Үрүҥ Күөлүттэн кийиит буолан тиийбит Анна Никитична Легантьева иккис дойду оҥостубут. Култуура эйгэтигэр 42  сыл  тухары үлэлээн, билигин бочуоттаах сынньалаҥҥа олорор Далбар Хотун сөбүлүүр дьарыктара –  хаартыска альбомнарын, кинигэни хомуйан оҥоруу. Кини бүтэһик сонунун «Киин куоракка» кэпсээтэ.

Анна Легантьева, СӨ култууратын үтүөлээх  үлэһитэ,  Орто  Наахара  нэһилиэгин  бочуоттаах  олохтооҕо:

– Биһиги Чамчабытыгар   Любовь Прокопьевна Мыреева  диэн  быраас  идэлээх  СӨ  доруобуйа  харыстабылын  үтүөлээх  үлэһитэ,  РФ  доруобуйа  харыстабылын  туйгуна   кэнники сылларга хаартыскаҕа түһэрэринэн  утумнаахтык  дьарыктанар.  Кини  үлэлэрэ  араас  хабааннаахтар:  боростуой  тыа  дьонун  олоҕун,  дьарыгын  көрдөрөр,  дьоллоох  оҕо  саас түгэннэрин, айылҕаны  олус сөбүлээн  түһэрэр.
Биһиги өрүспүт  сүнньүнэн  уонна  Чамча  өҥ  буоругар  үүнэр Саха  сирин уонна Арассыыйа Кыһыл кинигэтигэр киирбит үүнээйилэри хаартысканан үйэтиппитин  киһи  эрэ  сөҕө,  үөрэ  көрөр.  Бу хаартыскаларынан  аккырыыкка кэмпилиэгин  хомуйан, 
Ленскэй оройуоннааҕы айылҕа харыстабылын кэмитиэтэ (сал. Трофим Иванович Никонов) спонсордаан, 30 ахсаанынан бэчээттэттибит. Бу  Любовь  Прокопьевна  кэрэ  түгэннэри  түһэрбит  үлэлэрэ  кэм -кэрдии  кэрэһиттэрэ  буолан,  Чамчабыт  кэрэ  айылҕатын  көлүөнэттэн  көлүөнэҕэ  көрдөрө,  айылҕатын  харыстыырга  үөрэтэ  туруохтара.