Чахчы, тыыннаах курдуктар!

Манна СӨ уус-уран оҥоһуктарын маастара, СӨ үөрэҕириитин туйгуна, Саха сирин сыахай оҥорооччуларын сойууһун бэрэссэдээтэлэ Айталина Иванова «Саһыл тумса» уонна «Якутская керамика» үлэлэрин; Мэҥэ Хаҥалас улууһуттан СӨ уус-уран оҥоһуктарын маастара, Арассыыйа худуоһунньуктарын сойууһун чилиэнэ Агафья Колесова «Детские забавы», «Флора», «Аан Алахчын хотун» оҥоһуктарын; СӨ уус-уран оҥоһуктарын маастара, Арассыыйа худуоһунньуктарын сойууһун чилиэнэ, СӨ үөрэҕириитин туйгуна Дария Ноговицына «Под северным сиянием», «Сайылыкка киирии» үлэлэрин көрүөххэ сөп.

Итини сэргэ, Чурапчы улууһуттан СӨ уус-уран оҥоһуктарын маастара, Чурапчы улууһун уонна Төлөй нэһилиэгин норуодунай маастара Изабелла Кузьмина «Симэхсин эмээхсин», Хаҥалас улууһуттан СӨ уус-уран оҥоһуктарын маастара, Хаҥалас улууһун норуотун маастара, СӨ култууратын туйгуна Татьяна Лыткина «Дьөһөгөй Айыы» үлэлэрэ тураллар.

Бэлиэтээн эттэххэ, Саха сирин куукула оҥорооччуларын айар сойууһа (бэрэссэдээтэл А.П. Иванова) 2014 сыллаахха «Симэх» киин иһинэн тэриллибитэ. Билигин 200 кэриҥэ «любитель» куукула оҥорооччу уонна 35 маастар биир дьиэ кэргэн курдук иллээхтик-эйэлээхтик үлэлиир.

Быыстапкаҕа дьоһун миэстэни Сунтаар улууһун «Иккис тыын» сыахай оҥорооччуларын түмсүүтүн С.А. Зверев-Кыыл Уола «Кулун кугас аттаах Куллустай Бэргэн» олоҥхотун дьоруойдарынан дьүһүйүүтэ ылар. Көҕүлээччи – Мария Тараярова. Куратор – Маргарита Алексеева. Салайааччы – Кубаҕай Күн Сандаара Тиихэн кыыһа. Уун-утары Кыыл Уола сото кэбиһэн олорор, оттон олоҥхо дьоруойдара субу тиллэн кэлиэх, хамсаан барыах айылаахтар! Чахчы, тыыннаах курдуктар! Тарбахтарыгар талба талааннаахтар персонажтарын таҥастарын-саптарын, туттар тэриллэрин оннук ымпыктаан-чымпыктаан оҥорбуттар.

Быыстапканы кулун тутар 31 күнүгэр диэри көрүөххэ сөп.