Чөл олоҕу тарҕатыы нэдиэлэтэ саҕаланна

Нэдиэлэ устата медицинскэй тэрилтэлэр профилактическай матырыйааллара, көрдөрөр-иһитиннэрэр тиһиктэргэ, тэлэбиидэнньэҕэ уонна араадьыйаҕа быраастар тахсыахтара.

Нэдиэлэ сыала – инфекционнайа суох бааламмыт ыарыыларга профилактика, араас саастаах бөлөх дьонугар физическэй көхтөрүн таһымын үрдэтии, ону таһынан чөл олоҕу киэҥник тарҕатыы.

Министиэристибэҕэ бэлиэтээбиттэринэн, көхтөөх буолуу доруобуйа бөҕө туругун харыстыыр, сүрэх-тымыр ыарыыларын, саахар диабетын намтатар, киһи уопсай туругун бөҕөргөтөр. Доруобуйа аан дойдутааҕы тэрилтэтэ нэдиэлэҕэ 150 мүнүүтэ наҕыл физическэй актыыбынаһы уонна 75 мүнүүтэ биир кэм, күүрээннээх хамсаныыны сүбэлиир.

Сарсыардааҥҥы сэрээккэ – биир боростуой быраабыла. Маныаха хас сарсыарда аайы 10 мүнүүтэттэн итэҕэһэ суох бириэмэни анаатахха, күнүҥ көхтөөхтүк саҕаланар. Маны таһынан сатыы сылдьарга сүбэлииллэр.

Хаамыы ханнык баҕарар саастаах киһиэхэ биир соҕотох солбуллубат ноҕоруусканан буолар. Саамай көдьүүстээҕэ, хаамыыны күннээҕи олоххо киллэрэр наада. Бу сүрэх систиэмэтин эрчийэр, атах былчыҥнарын бөҕөргөтөр.

Үлэ күнүн устата, ордук олорор үлэлээх дьон аҕыйах мүнүүтэни хамсаныыга аныылларын, ону куруук оҥордоххо бастакы ыйдартан эт-сиин манна үөрэнэрин этэллэр.

Көхтөөх сынньалаҥ – балыктааһын, туризм, сибиэһэй салгыҥҥа оонньуулар, паарка устун сатыы хаамыы – бу барыта киһи доруобуйатыгар үчүгэйтэн, туһаттан атыны аҕалбат.